Qeveria shkrin Agjensinë Shtetërore të Blerjeve të Përqëndruara, e cila ishte në varësinë e Ministrisë së Brendshme, ndërsa krijon një shoqëri aksionere me kapital 100% shtetëror, e cila do të jetë në varësinë e Ministrisë së Ekonomisë.
Pra tenderat, bazuar në vendimin e Qeverisë, nuk do të kryhen më nga një strukturë që ishte në varësinë e Taulant Ballës si ministër i Brendshëm, por kalojnë në një tjetër strukturë që do të jetë në varësinë e ministrit të ri të Financave dhe Ekonomisë, Ervin Mete. Ky i fundit është propozuar pak ditë më parë në postin e ministrit, duke zëvendësuar Delina Ibrahimajn, ndërkohë që pritet dekretimi nga Presidenti, dhe më pas votimi i dekreteve në Kuvend, për të përmbyllur formalisht dhe ligjërisht procesin.
Vendimi është miratuar nga Qeveria, ndërsa shoqëria aksionere me kapital shtetëror është pagëzuar me emrin “Operatori i Blerjeve të Përqendruara”. Kjo shoqëri aksionere me kapital tërësisht shtetëror zëvendëson Agjensinë Shtetërore të Blerjeve të Përqëndruara, e cila u krijua rreth 3 vite më parë, duke pasur të njëjtat kompetenca, sikundër agjensia, thjesht ndryshon varësia, nga Ministria e Brendshme te ajo e Financave dhe Ekonomisë, por edhe emërtesa.
Sipas vendimit të Këshillit të Ministrave, “Operatori i Blerjeve të Përqendruara”, SH. A. do të kryejë procedurat e veçanta të prokurimit publik, në emër dhe për llogari të Kryeministrisë, ministrive dhe institucioneve të varësisë.
Propozimi është bërë nga ministri i Brendshëm dhe ministri i Financave dhe Ekonomisë, të cilët propozojnë krijimin e shoqërisë aksionere, me kapital 100% shtetërore, me emërtimin Operatori i Blerjeve të Përqendruara (OPB) për ofrimin e shërbimeve të prokurimeve për autoritetet/ entet kontraktore, në përputhje me kërkesat e legjislacionit përkatës në fuqi.
Sipas këtij vendimi, autoriteti publik që përfaqëson shtetin si pronar të 100% të aksioneve të shoqërisë aksionare, është ministria përgjegjëse për ekonominë.
VKM përcakton se kapitali fillestar i regjistruar për krijimin e shoqërisë aksionare të jetë 20.000.000 lekë dhe përballohet nga fondi rezervë i buxhetit të shtetit.
Ministria përgjegjëse për Ekonominë transferon këtë shumë pranë kësaj shoqërie menjëherë pas regjistrimit të saj në Qendrën Kombëtare të Biznesit.
Discussion about this post