Një javë më parë Gijotina.com publikoi 5 tenderët që kishte denoncuar “NRG shpk” në pronësi të lutura Nuredinit dhe ortakut Marco Genicco. Ashtu sikur e parashtruam, në këto pesë kontrata me objekt “dezinfektimin”, më e madhe është zhurma e kompanive për t’i marrë këto fonde, sesa puna për të garantuar shëndetin e njerëzve. Pra, ndërkohë që sezoni turistik ka nisur dhe insektet pushtojnë zonën bregdetare, zyrtarët dhe operatorët ekonomikë kacafyten duke e shtyrë spërkatjen për nga fundi i verës.
Dhe vendimet e marra për këto çështje nga Komisioni i Prokurimit Publik tregojnë qartë që në fund të ditës vendoset në favor të mikut më të fortë. Pra, aty ku pazaret nuk mbyllen me autoritetin kontraktor, ndërhyn KPP dhe i vë vulën abuzimeve me fondet publike.
Cila është kompania që favorizon KPP?
Kemi theksuar se një vit më parë, KLSH publikoi skandalin ku punonjësit e kësaj firme ishin edhe pjesë e stafit pranë Institutit të Shëndetit Publik.
Duke pasur këtë pushtet, pjesën më të madhe të tenderëve nga ky institucion kaq i rëndësishëm i fitonte kjo firmë. Pas bujës së këtij korrupsioni, disa institucione kanë ngurruar që t’i japin tenderë dhuratë kësaj firmë dhe e kanë skualifikuar nga gara.
Por “NRG shpk” nuk e ka pranuar këtë fakt dhe ka denoncuar pranë KPP Agjencinë e Bledi Çuçit për blerje të përqendruara me objekt “dezinfektimi ndaj mushkonjave”. Pas një jave, KPP ka marrë vendimet për të pestë tenderët në favor të Flutura Nuredinit
Në këto ankesa “NGR” ka kërkuar të bëjë rolin e urdhëruesit ndaj Autoritetit Kontraktor. Sepse ka kërkuar që të shtohen më shumë certifikata dhe dokumentacione, të cilat duhet të dorëzohen nga firmat e interesuar.
Në fakt, për këtë firmë një vit më parë KLSH raportoi se nuk përmbush kushtet për tenderët e dezinfektimit që kishte përfituar. Por, Komisioni i Prokurimeve nuk e ka marrë fare për bazë atë skandal dhe raportin e KLSH, prandaj tani ka vendosur në favor të ankimuesit “NGR”. Bëhet fjalë për tenderët që në total kapin vlerën 1 milion euro.
Vendimi
Dhe në vendimet për gjithsecilin, KPP ka të njëjtën përgjigje, që në fakt duket si një shkresë “Copy Paste”. Duke marrë si shembull vendimin për Durrësin, KPP shprehet se pranon një pjesë të ankesës dhe mbyll çështjen për këtë pikë. Ndërsa shprehet se vazhdon shqyrtimi për pjesën tjetër të ankesës.
Çka do të thotë se i ka dhënë të drejtë e Flutura Nuredinit dhe sigurisht asaj do t’i kthehet “biznesi” i përvitshëm i 1 milion eurove për spërkatjen që nuk kryhet fare. Ndërsa tenderët për dezinfektimin kanë ngecur dhe mushkonjat bëjnë namin në qytetet bregdetare, shpresojmë që ndonjë nga ata të SPAK-t ta vuajë pickimin e tyre dhe të marrë indicie për të filluar çështjen penale!
Lexo edhe: Veliaj hap çdo muaj tenderë për dezinfektim, paguan Pëllumb Gjokën
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post