Drejtoresha e AKSHI, Mirlinda Karçanaj, ka dalë rreth orës 17′;00 nga godina e SPAK pas tre orësh marrjeje në pyetje.
Ajo është pyetur nga prokurori special Bledar Maksuti, i cili ka në dorë dosjen e tenderëve të AKSHI-t, ku të paktën 12 prej tyre dyshohet se janë problematikë duke favorizuar kompani të caktuara. Në qendër të ciklonit është raporti preferencial i kompanisë Soft & Solution me AKSHI-n, e cila ka përfituar pjesën më të madhe të tenderëve të dyshuar si të parregullt. Ka dyshime se procedura të ngjashme janë ndjekur më herët edhe për tenderët e mëdhenj të fituar nga Advanced Business Solution.
Krahas të dhënave nga tenderët dhe dokumenteve, Skyweb.al mëson se SPAK ka në dorë edhe dëshmi komprometuese të vartësve të Mirlinda Karçanajt, të cilët kanë qenë pjesë e KVO-ve dhe kanë miratuar marrjen e procedurave nga Ermal Beqiri dhe biznesmenë të tjerë, pjesë e rrethit të përfituesve të mëdhenj të parave publike.
Roli i Gerond Meçes
SPAK po verifikon edhe rolin e kompanisë Advanced Business Solution, në pronësi të Gerond Meçes, pasi kjo kompani kishte ankimuar thuajse të gjithë tenderët e mëdhenj të AKSHI-t dhe një moment papritur është tërhequr nga të gjitha ankesat, duke ngjallur dyshime për një marrëveshje nën tavolinë.
Skyweb.al raportoi më herët edhe një skemë që dyshohet se është aplkuar në tenderët e AKSHI-t për zhvatjen e parave publike.
Skyweb.al mëson se në qendër të hetimeve që mund të çojnë në zbulimin e një mega-skandali të tenderëve të AKSHI është kompania Soft & Solution e Ermal Beqirit, e cila dyshohet se është përdorur nga persona që kanë pasur nën kontroll vendimmarrjen e Mirlinda Karçanajt.
Sipas burimeve, pasi tenderët merreshin nga Soft & Solution, kompania angazhonte gjoja për marrje shërbimesh një ose dy kompani të lidhura me personazhet që kontrollonin Karçanajn dhe KVO-në në AKSHI, duke pranuar fatura, ndërsa puna në fakt bëhej nga stafi i Ermal Beqirit.
Kjo skemë përdorej për të justifikuar më pas transfertat financiare përmes kontratave të shërbimit.
SPAK po heton pikërisht faturat e shërbimeve të marra nga Soft & Solution, pas dyshimeve se të paktën një kompani në emër të një biznesmeni të njohur ka lëshuar fatura të shumta për shërbime fiktive ndaj kësaj kompanie. /skyweb.al
Discussion about this post