Saga e institucioneve me dhënien e tenderëve në shkelljue të rregullave të prokurimit publik nuk kanë fund. Sidomos kur bëhet fjalë për Autoritetin Rrugor Shqiptar, i cili është kampion në këtë fushë. I tillë është edhe rasti i sotëm ku rezulton se kompania “Gjikuria” ka përfituar rreth 12 milion euro në tenderin më të freskët të dhënë nga institucioni që drejtohet nga Evis Berberi.
Tenderi paraqitet i dyshimtë në disa drejtime. Më konkretisht bëhet fjalë për procedurën e prokurimit me numër reference REF-24715-04-11-2022 dhe me objekt “Rikonstruksion i aksit rrugor Maliq-Lozhan i Ri-Strelcë” me fond limit 1,183,260,667 lekë të reja pa TVSH ose rreth 12 milion euro përfshirë TVSH.
Në dokumentacionin përkatës shikohet se disa firma kanë ofruar shifra më të ulëta sesa GJIKURIA, e megjithatë nuk kanë fituar. Bëhet fjalë për plot 4 kompani të cilat kanë ofruar oferta më të ulëta. Diferenca mes firmës GJIKURIA dhe ofertës më të ulët është gati 1 milion euro, shifër për të vënë duart në kokë.
Në rastin më të mirë kjo është një humbje e pastër për shtetin shqiptar. Ndërkaq nga ana tjetër vihet re se vlera fituese është thuajse identike me fondin limit të tenderit, thuajse 98.4%. Të gjitha fakte e mësipërme ngrenë dyshime të forta se kemi të bëjmë me një fitues të paracaktuar.
Firma Gjikuria është përmendur shpesh për llokma të mëdha tenderësh të marra vitet e fundit nga qeveria aktuale dhe institucionet e saj. Bëhet fjalë për tendera në vlera tepër të larta dhe jo thjesht miliona lekë. Kryesisht tenderët e përfituara nga kjo kompani janë për ndërtim veprash infrastrukturore, kryesisht rrugë.
Discussion about this post