Bashkia e Durrësit, e drejtuar nga kryetarja e emëruar, Emirjana Sako ka zhvilluar një tjetër tender duke skualifikuar të gjithë konkurrentët, përveç fituesit. Eliminimi i konkurrencës në tenderët publik, është kthyer në një metodë të zakonshme për bashkitë e vendit.
Bëhet fjalë për procedurën e hapur në datën 28 korrik 2021, me numër reference REF-01774-07-27-2021, që ka si qëllim rikonstruksion e rrugës së Liqenit të Radës, në Manzë. Kjo procedura mban fondin limit prej 12.499.880 lekë të reja, ose rreth 125 milionë lekë të vjetra. Në këtë tender kanë marrë pjesë në garë 9 kompani, “SHKELQIMI 07”, “K-AAV”, “KOMBEAS”, “K.M.K”, “K.TURJA”, “LIQENI VII”, “DAJTI PARK 2007”, “LEON KONSTRUKSION”, si dhe “SARK”.
Ndërkohë 8 prej kompanive janë skualifikuar nga gara, përveç kompanisë “K.TURJA SHPK”, e cila është shpallur dhe fituese e këtij tenderi. Kjo procedurë është shpallur me flamur të kuq nga “Open Data” me komentin “skualifikimi i të gjithë operatorëve konkurrues përveç fituesit”.
Ky tender është përcaktuar me risk, që do të thotë se krijon dyshime që fituesi mund të jetë paracaktuar nga Bashkia e Durrësit. Këtë dyshim e përforcon edhe kohëzgjatja e përcaktimit të fituesit, pasi për të gjetur arsyet për 8 kompanitë e skualifikuara, Sakos i është dashur 5 muaj për të përzgjedhur kompaninë që do të zhvillojë punimet.
Gijotina.com
Discussion about this post