Kur punët publike bëhen shkel e shko, duhet të dalin sërish fonde nga arka e bashkisë dhe prapë tendera. Ermal Dredha ka në agjendë këtë radhë 5 shkolla dhe kopshte që duhen rregulluar. Një pjesë e tyre rezulton se kaluan në rikonstruksion vetëm pak kohë më parë. Më konkretisht, Bashkia Vlorë ka zhvilluar tenderin me objekt. “Rikonstruksioni i kopshteve dhe shkollave (Rikonstruksioni i shkollës “Hasan Pulo”, Orikum, rikonstruksion i kopshtit nr. 14, rikonstruksion i shkollës “Jani Minga”, rikonstruksioni i tualeteve të shkollës “Ismail Qemali”, “15 Tetori” dhe kopshtit Nr. 5)”
Duam të theksojmë që në fillim se për shkollën “Hasan Pulo”, shkollën “Jani Minga dhe për kopshtin nr.14 do të bëhet risovatim i mureve dhe i fasadës jashtë, ndërsa për institucionet e tjera do të bëhet rikonstruktim i tualeteve dhe rregullimi i sistemit të ujit.
Gjithashtu duam të tregojmë që një pjesë e këtyre institucioneve janë rikonstruktuar edhe më parë, por tani do të derdhen sërish para. Marrim rastin e shkollës “Ismail Qemali” e cila në vitin 2018 i është nënshtruar një rehabilitimi, madje punimet u bënë gjatë sezonit mësimor dhe nxënësit u detyruan të zhvillojnë mësim me turne në shkolla tjera.
Por në atë vit paskan harruar të rregullojnë tualetet dhe po i kthehen sërish punës. Prapë punime në mesin e sezonit mësimor!
Tender i parregullt
Ky tender është vlerësuar nga Open Data Albania me “Flamurin e Kuq” që është shenja e riskut të korrupsionit. Janë 8 kompani kanë shfaqur interes për këtë tender ku prokurohen 233 milion lekë vetëm për lyerje fasadash.
Gjithsesi Dredha e kishte përzgjedhur fituesin e kësaj torte që do ketë vetëm 3 muaj punë. Komisioni i Vlerësimit skualifikoi 5 ofertat e tjera dhe la të vlefshme vetëm ofertën e firmës “KOMBEAS” SHA. Nga të gjithë operatorët 2 N sh.p.k kishte edhe ofertën më të ulët se fituesi, por është fshirë nga gara me argumentin se ka mungesë dokumentacionesh.
Kështu pa konkurrent fare u bë publik fituesi “KOMBEAS” SHA, në pronësi të biznesmenit Mhill Ndreca me përqindjen më të madhe të aksioneve dhe të dy biznesmenëve të tjerë.
Kujt ia jep paratë Dredha?
Ndreca është një emër mjaft i njohur, në vitin 2019 ai është dënuar me 20 ditë burg për shkak se më firmën ën fjalë ka përfituar para duke mashtruar me TVSH. Në shtator të viti 2019, Prokuroria e Tiranës kërkoi burg për 15 biznesmenë të cilët akuzoheshin se kanë krijuar një skemë mashtrimi me faturat e tatimit të vlerës së shtuar, rezultojnë të jenë aksionerë dhe pronarë të disa kompanive, që kanë përfituar shuma të mëdha parash nëpërmjet tenderave.
Gjatë seancës, prokurorja Imeraj deklaroi se “hetimi lidhet me deklarimin e veprimtarisë së këtyre subjekteve në organet tatimore. Të dyshuarit kanë krijuar skemë mashtrimi.” Edhe drejtoria e Hetimit Tatimor ka deklaruar se “BTI”, “UniService”, “EBA Ndërtim”, “Banis shpk” dhe “Aleni shpk” dyshohet se kanë konsumuar veprën e krijimit të skemave mashtruese lidhur me tatimet.
Ndërkohë në muajin tetor u dha vendimi nga Gjykata e Apelit e cila dënoi me 20 ditë burg Ndrecën dhe disa biznesmenë të tjerë, një masë shumë e zbutur kjo në raport me atë që kishte kërkuar Prokuroria.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post