Historia me procedurat e prokurimit të institucioneve të vendit mbetet një problematik serioze. Siç e kemi thënë pothuajse çdo ditë, problematikat lidhen me kriteret që vendosen në shkelje të ligjit e deri tek procedurat për blerje mallrash të thjeshta me shpenzime marramendëse. Këtë problematik e kësaj radhe e hasim edhe në institucionin e Presidencës, në një tender të bërë së fundmi.
Në datën 13 Prill, Presidenca ka hapu një tender për blerje bojërash për fotokopje, printera e fakse. Procedura mban numrin e referencës REF-24997-04-13-2022 dhe ka fondin limit prej 2.500.000 lekë të reja, ose 25 milionë lekë të vjetra. Siç duket edhe Presidenca nuk kryen procedura të rregullta tenderimi dhe këtë na e tregon një ankesë që ka mbërritur në Komisionin e Prokurimeve Publike për këtë procedurë.
Ankesa është bërë nga kompania që ka marrë pjesë në garë, “INTERLOGISTIC”, e cila pasi ka parë kriteret e tenderit ka konstatuar disa pasaktësi. Sipas kompanisë, Presidenca nuk ka përcaktuar qartë mostrat që kërkon të blejë. Kompania shprehet se kjo paqartësi bie në kundërshtim me ligjin nr.162/2020 i Prokurimeve Publike. Konstatimi i dytë i kompanisë është edhe afati i vendosur për kohëzgjatjen e kontratës, ose afati i zbatimit të kontratës që është lënë vetëm 7 ditë. Ky afat sipas kompanisë, është i shkurtër kjo pasi bëhet fjalë për furnizimin me sasi dhe lloje të ndryshme tonerësh të cilat importohen nga furnitorë të ndryshëm ndërkombëtarë.
Kujtojmë se vendosja e kritereve të tilla në kundërshtim edhe me ligjin në procedurat publike, bëhet në ato raste kur institucioni që e bën ka paracaktuar fituesin e tenderit. Por të shpresojmë që nuk e bën këtë gabim institucioni që drejtohet nga Ilir Meta, që e konsideron veten si president opozitar. E aq më shumë kur ka akuzuar qeverinë për shpërdorim të taksave të qytetarëve, ndërkohë që institucioni i tij do të shfrytëzojë 25 milionë lekë në kundërshtim të ligjit.
Gijotina.com
Discussion about this post