Abuzimet me tenderët e institucioneve publike, shpesh herë fshihen në detaje, me qëllim që të jenë të paracaktuar dhe të shmangin konkurrencën e drejtë mes kompanive që ofrojnë shërbimet e tyre. Kështu duket se ka ndodhur dhe me një prokurim publik të hapur së fundmi nga Qendra Spitalore Universitare në Tiranë (QSUT). Në tenderin e shpallur më 3 shtator 2021 për shtretër spitalorë, me fond limit 31 milionë e 533 mijë lekë, QSUT ka vendosur disa kritere të çuditshme, të cilat janë kundërshtuar pranë Komisionit të Prokurimeve Publike nga operatorët ekonomikë.
Në ankesën e siguruar nga Gijotina.com rezulton se janë disa specifikime, të cilat cilësohen absurde nga kompanitë që duan të konkurrojnë, duke ngritur dyshime se janë bërë për favorizimin e një kompanie të caktuar. Një prej tyre është edhe specifikimi konkret që “Kapaciteti i peshës mbajtëse të jetë 230-250 kg”.
“Specifikimi i kërkuar është një kapacitet mbajtës i lartë dhe i panevojshëm për krevatet spitalore. Persona me peshë më të madhe se 200 kg janë shumë të rrallë për të thënë që nuk ka fare. Në mënyrë që të hapet gara për të gjithë prodhuesit, kërkojmë që të përfshihet kapaciteti maksimal 200 kg, pasi një kapacitet i tillë i krevatit i shërben 99.99% të pacientëve d
he nuk mund të bëhet arsye skualifikuese”, thuhet në ankesën e paraqitur në KPP.
Ndërkohë, në këto specifikime vihen re edhe kontradikta, që krijojnë paqartësi te operatorët, siç është lartësia e krevatit, ku në një pikë kërkohet 68 cm, ndërsa në një pikë tjetër lartësia kërkohet 50-54 cm. Megjithatë, ekspertët shpesh herë kanë ngritur shqetësimin se këto detaje vendosen për të favorizuar klientët pushtetit.
Gijotina.com
