Energjia vazhdon të blihet çdo ditë e më shtrenjtë nga OSHEE. Mbi 50 euro mbi çmimin e bursës për Mwh, ky është rregulli i pashkruar i blerjeve që kanë vendosur kompanitë pjesëmarrëse dhe FTL (pjesë e OSHEE Group). Konkretisht, sot në HUPX, bursa energjetike e rajonit të Ballkanit, çmimi më i lartë (në periudhën pik) është 234, 19 euro për Mwh. OSHEE bleu sot me çmimin 287.48 euro për Mwh Duke u justifikuar se nuk arrin të gjejë sasinë e plotë të kërkuar në treg, korporata zhvillon thuajse çdo tre ditë tenderë duke rritur koston e blerjes.
Mësohet se OSHEE-ja ka dashur të blejë 75.6 mijë megavat në orë energji elektrike, për periudhën 18-24 tetor. Ka siguruar rreth 60% te sasisë se kërkuar ose mbi 45 mijë megavat me çmim mesatar 287.48 euro për MWh, me vlerë rreth 13 milion euro. Duke mos arritur të plotësojë gjithë kërkesën në fazën e parë FTL ka rihapur sërish ankandin ku në lotin parë kompania kërkoi 13 104 MWh energji për fashën orare 00:00-24:00 ndërkohë që në lotin e dytë 13 328 MWh për orarin 07:00-23:00. Kjo është procedura e katërt që Furnizuesi i Mundësisë së Fundit zhvillon për muajin tetor në tentative për të siguruar energjinë e nevojshme për konsum.
Në fillim të javës FTL kërkoi të siguronte mbi 44 mijë Mwh energji në një procedurë që u zgjat në disa faza dhe që nuk arriti të siguronte 100 për qind të sasisë së kërkuar. Diferenca për OSHEE u plotësua nga Korporata Elektoenergjetike Shqiptare, ndërkohë që fondi i shpenzuar në këtë ankand ishte 7.5 milionë euro. Totali i blerjeve të energjisë në tregun e lirë vetëm për tetorin i kanë kushtuar Furnizuesit të Mundësisë së Fundit deri më tani 34.7 milionë euro.
Ky i fundit hapi këtë të premte një tjetër procedurë për të blerë energji nga tregu i lirë për datat 18-24 tetor. Në fazën e parë të procedurës u kërkuan 75 600 MWh energji. Nga mbyllja e fazës së parë OSHEE siguroi 65 për qind të sasisë së kërkuar me një vlerë prej 14 milionë euro ku nga dy lotet çmimi mesatar rezultoi 266 euro/ MWh dhe 318 euro MWh.
