Një lajm i mirë dhe një i keq nga Bashkia Shkodër: Së shpejti do të riparohen dhe lyhen fasadat në tre rrugë dhe një bllok banimi. Ndërsa tenderi i projektimit për këto punë vlerësohet me “Flamurin e kuq” të korrupsionit.
Abuzimi me tenderin që po shoqëron procedurën e prokurimit për projektimin e ndarë në 4 lote, paralajmëron se projekti do të përfundojë thjesht në një lyerje fasade dhe mbushje gropash. Në fakt, kaq i mjafton kryetarit të bashkisë Benet Beci për të justifikuar premtimet elektorale.
Objekti i kontratës është “ Projektim për objektin: Rikonstruksion rrugë dhe Rikualifikim urban blloqe banimi”, është i ndarë në 4 lote:
Loti i Parë: Projektim për objektin: Rikonstruksion Rruga ” Ernest Bushati”;
Loti i Dytë: Projektim për objektin: Rikonstruksion Rruga “Marin Beçikemi” (Degëzim);
Loti i Tretë: Projektim për objektin: Rikonstruksion Rruga “Gjon Gazulli”;
Loti i Katërt: Projektim për objektin: Rikualifikim Urban Blloku i Pallateve “Vëllezërit Frashëri”. Fondi limit i caktuar për projektimin është 2,477,499 lekë pa tvsh.
Më datë 26 prill 2024, stafi i Becit ka mbyllur garën për tenderin me objekt “Loti i Katërt: Projektim për objektin: Rikualifikim Urban Blloku i Pallateve “Vëllezërit Frashëri”, për të cilin janë dhënë 10 milionë lekë.
Për këtë tender fillimisht janë paraqitur 10 oferta me vlera përafërsisht të njëjta tek 8 milionë lekë.
Por deri në fazën përfundimtare Beci i kishte përjashtuar 9 prej tyre, duke lënë në finale vetëm firmën Palma Konstruksion Shpk, në pronësi të Edlira Kolecit.
Nga krahasimi i ofertave tërheq vëmendjen Operatori ekonomik “LENI-ING” sh.p.k, me administrator z. Nikoll Paluca, e cila ka ofertë të barabartë me studion fituese. “LENI-ING” shpk ofron ta kryejë punën me 868,735 lekë, ndërsa “Palma Construction” shpk ka propozuar vlerën 868,743 lekë.
Argumenti i skualifikimit për “LENI-ING” është: “Pasi vlera e ofertës tuaj është nën vlerën minimale të lejuar”. Në kuptimin e vendimit të qeverisë të cilit i referohet komisioni i Becit, duhej të eliminohej edhe studioja “Palma Construction” sepse kanë ofertë të plotësisht të barabartë.
Me këtë justifikim është eliminuar edhe kompania “HYDRO-ENG CONSULTING” sh.p.k që e ka pasur ofertën në vlerën 839,371 lekë.
Për tu dukur sikur në këtë prokurim ka ndershmëri, ka edhe një pikë tjetër që do t’ju lërë të habitur: Më datë 13 maj 2024 u bë shorti mes dy ofertuesve të kualifikuar që rezultonin me vlera të barabarta , “NOVATECH STUDIO” sh.p.k dhe “Palma Construction” sh.p.k.
Bingo: Në përfundim të procesit të shortit rezulton në vend të parë “Palma Construction”.
Sipas ligjit, ky tender duhej anuluar dhe jo të zëvendësohej konkurrenca me lotarinë.
I gjetur në fazën finale pa asnjë konkurrent përballë, Palma Konstruksion Shpk e ka përfituar kontratën duke u favorizuar hapur nga bashkia.
Për këtë abuzim Open Data Albania i ka vendosur ‘Flamurin e Kuq’, që është simboli i riskut të korrupsionit.
Më 26 prill kanë qenë faza përfundimtare edhe për tre lotet e tjera, që me siguri do të ndahen përmes këtij tenderi fasadë.
Më parë kemi raportuar tenderët për pastrim, për vija të bardha që kanë kushtuar qindra milionë lekë të dhëna në tendera pa garë. Së fundmi, kemi shkruar për milionat që shpenzoi kryetari Beci për kazanët e plehrave dhe tani i është vënë lyerjeve të pallateve. Në gjithë këto punë publike kryefjalë është “prokurimi” që bëhet bë favor të klientëve të kryetarit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post