Fshatrat e Belshit do të ndriçohen më në fund, pasi kryetari i bashkisë, Arif Tafani sapo e bëri tenderin. Kryetari bën një rrugë dhe dy punë: vendos këto llambat, por edhe i jep ca lekë biznesmenit Julian Manehasa. Ky i fundit ka rrëmbyer menjëherë disa tendera në Lushnjë dhe tashmë i ka lidhur telat me Tafanin.
I tillë është tenderi i fundit ku do të shpenzohen 18 milionë lekë për të blerë llamba rruge. Po flasim për prokurimin me numër reference REF-09688-06-18-2024 dhe objekt ‘Ndriçues rrugor led për fshatrat e Bashkisë Belsh’ i shpallur më datë 19 qershor 2024.
Tafani e la “garën” hapur deri më datë 1 korrik 2024 dhe u mblodhën oferta nga 7 kompani. Nga këto, Adenis Kastrati me vlerë 14 milionë lekë dhe Ervin Luzi PF me vlerë 12 milionë lekë, kishin dorëzuar ofertat më të lira. Gjithsesi, fituesi është i paracaktuar, pasi këto dy kompani sëbashku me 4 kompanitë të tjera u skualifikuan që në fazën e parë, me argumentin se kanë patur ofertë “anomalisht të ulët”, ndërsa Adenis Kastrati ka patur mungesë në dokumentacione.
Gara prandaj është e zhvilluar me faza, që komisioni për çdo mangësi apo problematik të komunikojë më pjesëmarrësit dhe në rast se ata nuk plotësojnë kërkesat deri në afatin e fundit, atëherë eliminohen. Por, Tafani ka përtuar të ndjekë këtë proces dhe i ka rënë shkurt, duke përjashtuar të gjitha ofertat, përveç atë fituese. Kështu, firma “T&J Construction” sh.p.k, me pronar Julian Manahasa, edhe pse kishte ofertën më të shtrenjtë u shpall fituese e fondit. Më datë 5 korrik 2024, Tafani e ka bërë publike kontratën përmes Agjencisë Prokurimeve Publike. Menjëherë pas analizimit të të dhënave, Open Data Albania e ka vlerësuar me “Flamur të kuq” për cenim të konkurrencës. Kjo është shenja e riskut të korrupsionit.
Në foto janë llambat led që kërkohen të furnizohen, ndërsa nuk është e qartë nëse fituesi i tenderit do të bëjë edhe instalimin. “T&J Construction” sh.p.k, në të njëjtën ditë përfitoi një tender pa garë edhe nga Bashkia Lushnjë. E si mund të jetë Arif Tafani jashtë zinxhirit të korrupsionit që bëhet nga bashkitë, prandaj e ka patur të qartë se kujt do t’ia jepte fondin e dritave.
Sakaq, siç raportuam në hyrje të shkrimit, 18 milionë lekë janë vënë në dispozicion për të blerë 250 ndriçues rruge si ato në foto për fshatrat në Belsh. Por, nuk përcaktohet për cilat fshatra dhe për sa ndriçues ka nevojë secili prej tyre, duke ditur që edhe vetë qyteti Belshit ka rrugica të vogla që mbulohen vetëm me disa drita.
Tenderi i është dhënë një kompanie që nuk ka asnjë licencë apo certifikim. Në dokumentin e QKB më poshtë të datës së sotme, tregohet se biznesmeni Manehasa nuk ka ndonjë licencë aktive.
Theksojmë se kompania përfituese e këtij tenderi nuk plotëson as kriteret për të marrë pjesë në tender, sepse nuk ka dorëzuar tre bilance të viteve të njëpasnjëshme financiare. E megjithatë, Manehasa mori 18 milionë lekë, duke u skualifikuar 6 operatorë të tjerë, me urdhrin e “Beut” të Belshit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post