Kryebashkiakja e Roskovecit, Majlinda Bufi, shënon rekord të ri në shpërdorimet e buxhetit. Më datë 18 korrik 2024 është publikuar kontrata e tenderit me objekt ‘Rikonstruksion i rrugës “Kozma Prifti”, fshati Marinëz, (905+265 ml , b=4m+0.5 bankin’. Sipas të dhënave në dokumentet e tenderit, në rrugë do t’i hidhet një shtresë asfalt. Dhe bëhet fjalë për një segment me gjatësi 1 km të gjatë. Gjithsesi rikonstruksioni i kësaj rruge ekzistuese do t’u kushtojë shtrenjtë taksapaguesve nga Rroskoveci.
Bufi ka planifikuar të shpenzojë 116 milionë lekë për këtë punë. Për një punë që zgjat vetëm 3 muaj dhe që merr një fond të madh, kanë shfaqur interes 14 kompani.
“INFINIT” SHPK kishte propozimin më ekonomik, me vlerë rreth 80 milionë lekë, është skualifikuar nga gara pasi rezulton, sipas komisionit të vlerësimit, të jetë ofertë “anomalisht e ulët”. Po ta frysh fondin limit sipas interesit të një kompanie të caktuar, sigurisht që ofertat ekonomike ngjajnë “anomalisht të ulëta”. Ndërkohë fill pas “INFINIT”, janë përjashtuar edhe 12 firma të tjera, të cilat kishin vlera të përafërta me kompaninë që është shpallur fituese.
Sipas fakteve, kompania duket që ishte paracaktuar si fituese, si pasojë janë përjashtuar 13 firma menjëherë dhe është lënë mbiu tavolinën e kryetares vetëm zarfi me ofertën e “RRUGA URA ASFALTIM NR.2 ELBASAN”.
Firma ka pronar Kujtim Hasën nga Elbasani, që është favorizuar nga qeveria me koncesione dhe privatizime.
Kështu, pa asnjë konkurrent përballë me ofertën 83 milionë lekë kjo kompani përfitoi kontratën për të mbushur gropat e kësaj rruge në Rroskovec. Open Data Albania i ka vendosur tenderit ‘Flamur të kuq’ që është shenja e riskut të korrupsionit. Ky flamur është për të treguar abuzim me fondin pasi evidentohen shkelje të ligjit ‘Për Prokurimet Publike’.
Kjo nuk është hera e parë, sepse kryetarja Bufi është përfshirë në skandale edhe më të mëdha. Kujtojmë se më datë 24 maj 2024, një grup banorësh nga fshati Suk në Bashkinë Roskovec, depozituan një kallëzim në SPAK për falsifikim dokumentesh dhe shpërdorim detyre për kryetaren e bashkisë Roskovec Majlinda Bufi për “Shpërdorim detyre” dhe “Falsifikim dokumentesh”.
Banorët pretendojnë se kryebashkiakia dhe disa zyrtarë të tjerë të bashkisë synojnë të lejojnë ndërtimin e një termocentrali me gaz duke rrezikuar shëndetin e të rriturve dhe fëmijëve.
Ndërkohë, më herët Bufi ishte thirrur në SPAK për një kallëzim të opozitës për krime zgjedhore gjatë fushatës së vitit 2023.
Ndaj saj pati një kallëzim në Prokurorinë e Posaçme pas një videoje të shfaqur në një emision investigativ në vitin 2023, ku kryebashkiakja shihej teksa i bënte presion me shkarkim nga puna një sanitareje për arsyen se kishte marrë pjesë në një miting të opozitës, në prag të zgjedhjeve lokale të 14 majit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post