Një nga institucionet që bën shpesh tendera të dyshimtë është edhe Bashkia e Durrësit. Nuk kanë qenë të pakta rastet kur institucioni që drejtohet nga Emiriana Sako, zhvillon procedura publike në shkelje të rregullave të prokurimit publik për të favorizuar kompanitë e miqve. Edhe në tenderin e radhës, duket se jo gjithçka shkon siç duhet.
Bëhet fjalë për tenderin e hapur në datën 13 maj nga Bashkia e Durrësit, për rikonstruksionin e hapësirave publike në bllokun e banimit në Lagjen nr.17 dhe tek Muzeu i Dëshmorëve. Tenderi mban numrin e referencës REF-28961-05-13-2022 dhe ka fondin limit rreth 62,490,403 mln lekë të reja pa TVSH, ose rreth 625 milionë lekë të vjetra pa TVSH.
Në këtë tender kanë marrë pjesë disa kompani, por për habi nuk ka fituar ajo me ofertën më të ulët. Fituese është shpallur kompania “LIQENI VII” në pronësi të Ramazan Kalia në bashkëpunim me “NREGJONI” që është në pronësi të Xhetan Ndregjoni. Vlera fituese është 55.230.394 lekë të reja pa TVSH ose rreth 660 milionë lekë të vjetra me TVSH. Kjo vlerë ndërkaq rezulton të jetë sa 88.38% e fondit limit të tenderit, duke ngritur akoma më tej dyshimet për një fitues të paracaktuar.
Pra rezulton se ka fituar një firmë e cila ka ofruar gati 240 milionë lekë të vjetra me TVSH më shumë sesa oferta e një tjetër kompanie pjesëmarrëse në tender. Ky është një tjetër rast ku Bashkia Durrës jep tender pa vlerësuar ofertat më të ulët. Por duke qenë se kjo procedurë nuk është as e para as e fundit, urojmë që me kaq shumë lekë, hapësirat publike në Durrës mos të mungojnë dhe të jenë me standard.
Discussion about this post