Në mungesë të kryeministrit Edi Rama, seanca ka vijuar me fjalën e deputetëve demokratë dhe socialist duke qenë se kryedemokrati Lulzim Basha refuzon të flasë pa praninë e kryeministrit i cili nuk është paraqitur siç e paralajmëroi se do ishte prezent në orën 17:00.
Në momentin kur kryetarja e Kuvendit ka dhënë fjalën Arben Ahmetaj pranë foltores është afruar deputeti i PD, Enkelejd Alibeaj. Kjo ka bërë që garda të rrethojë foltoren për të shmangur një incident të mundshëm.
Por, pas disa insistimeve nga ana e deputetit demokrat Enkelejd Alibeaj, Nikolla i ka dhënë fjalën deputetit të PD. Ndërkohë që Ahmetaj e ka pritur në këmbë.
“Nuk e di a ishit këtu. A e dëgjuat kryeministrin. Ai ka dhënë mundësinë që ju të jeni të në respekt të rregullores duke ruajtur të drejtat. Të paktën respekto rregulloren. Po të kujtoi se çfarë debati dje në konferencë. Është çështje për mënyrën se si ju drejtoni këtë seancë” – tha Alibeaj.
Pas mbarimit të minutazhit, Nikolla i ka ndërprerë mikrofonin Alibeajt, por përsëri ai nuk është larguar nga foltorja. Kjo gjë ka detyruar kryetaren e Kuvendit që ta ndërpresë përsëri seancën për 10 minuta.
