Ish-ministri i Mbrojtjes Fatmir Mediu, i cili po gjykohet në GJKKO për tragjedinë e Gërdecit është përballur në gjyq me familjarët që humbën të afëmit e tyre nga ngjarja e rëndë e vitit 2008.
Ata e kanë cilësuar Mediun si “kriminel” ndërsa i janë drejtuar me fjalët se duhet “t’i vijë turp”.
Nga ana e tij, Mediu e ka cilësuar gjyqin si proces politik
“Para Gërdecit janë vrarë mbi 100 njerëz në Qafë Shtamë, Gjegjan, Gjirokastër, Dhëmblan. U mbytën 19 persona në det. Janë vrarë 2 muaj pas Gërdecit në Uzinën Ushtarake të Poliçanit, janë vrarë në Skrapar në 2011. Pse nuk u ngarkuan ministrat me përgjegjësi, se si ishte magazinuar, ruajtur dhe demontuar municioni. Apo në rastin e Gërdecit duhet një kokë turku?”, është shprehur Mediu në sallën e gjyqit.
Por sipas familjarëve “faji është i prokurorëve që nuk ngrenë akuzë për vrasje”
“Faji është i prokurorëve që nuk ngrenë akuzë për vrasje. Nuk të dëgjojmë dot, është absurde, je kriminel, turp të të vijë”, kanë shpërthyer familjarët e viktimave në drejtim të ish-ministrit Mediu.
Ky i fundit është përgjigjur se me këto “përplasje, ky nuk është proces gjyqësor, por proces politik”
“Unë kam ardhur në respekt të Gjykatës dhe drejtësisë për një proces të drejtë ligjor dhe jo për gjyqet politike famëkeqe të kohës së shkuar, ku vendos “partia” dhe jo ligji. Prandaj, ju kërkoj e nderuar Gjyqtare, duke falënderuar gazetarët, që ky gjyq të bëhet live, në prani të kamerave të televizioneve.
Kjo kërkesë e fundit e imja është për të provuar pakundërshtueshmërinë e transparencës, që unë dëshiroj të përcjell në këtë proces politik joligjor, por edhe rruga e vetme për të shmangur subjektivizmin e qëllimshëm dhe mos respektimin e ligjit”, ka theksuar Mediu.
Ndërkaq, Gjykata është tërhequr në dhomë këshillimi për të shqyrtuar kërkesën e avokatëve të Mediut se vendimi final i ekspertizës ekonomiko-financiare nuk i është vëne në dispozicion të pandehurit ose mbrojtjes dhe se ekspertët janë zgjedhur në mënyrë të njëanshme si dhe ekspertiza është e papajtueshme me ligjin. Ndërkohë sipas akt ekspertizës dëmi i prodhuar nga tragjedia e Gërdecit shkon në 16 milionë euro.
Deklarata pas seancës
Në mbyllje të seancës, Mediu u ndal para medieve, ku tha se deri më tani nuk është provuar asnjë lloj dëmi ekonomik i shkaktuar nga veprimet apo mosveprimet e ministrit.
“Ministri akuzohet për shpërdorim detyre. Shkelja me dashje që kanë sjellë pasoja apo përfitime personale në dëm të interesave të shtetit. Nuk është provuar asnjë përfitim personal, nuk është provuar asnjë lloj dëmi ekonomik për shkak të veprimit të ministrit të Mbrojtjes”, theksoi Mediu.
“Çfarë lidhje ka dëmi ekonomik me shpërthimin e Gërdecit? S’ka asnjë lidhje ligjore dhe shkakësore. Tek akti i ekspertimit janë thirrur përfaqësues të KLSH dhe ministrisë së financave, e kanë të ndaluar me ligj dhe nuk kanë certifikatë. Kanë bërë kontrolle në ministrinë e mbrojtjes dhe nuk kanë gjetur shkelje. Në një seancë sqaruam atë akuzë prej 16 vjetësh që ministri zgjodhi Gërdecin. Nuk kishte ministri asnjë dije dhe nuk e ka zgjedhur Gërdecin. Pala mbrojtëse, tha se nuk është problem se ministri zgjodhi Gërdeci por kushtet teknike”, u shpreh ai
Ish-ministri tha se po bëhet “kokë turku”.
‘Po ju them, se do ju bëj me dije një video ku duket qartë se pas saldimit, baruti nuk mund të marr për shkak të nxehtësisë së saldimit. Nuk është salduar. Roja objektit ka thënë se karroca ka hyrë 30 minuta para shpërthimit. Pse nuk pranojnë të bëjnë një akt ekspertimi. Duan një gjyq politik, ‘koka turku’. Kjo çështje është gjykuar. Urdhri përgatitet nga stafi civil dhe ushtarak, firmoset dhe zbatohet. Kisha me vete 39 urdhra të ministrave të Mbrojtjes para dhe pas meje. Të gjithë shkruajnë në shkresa se transporti bëhet nga FA. Ka në Ministrinë e Mbrojtjes akte që tregojnë sa janë kostot dhe kush i paguan. Ministri i referohet akteve ligjore që janë sipër tij”, tha më tej Mediu.
Sipas ish-ministrit, procesi i demontimit u firmos nga ai, pasi u kërkua nga NATO.
“Mendoj se gjyqi është politik, e ka bërë politika. Nëse SPAK dhe Gjykata ka ardhur tek ideja e bilanceve e dënimeve politike, nuk është drejtësi më. Kjo që kërkon SPAK në akuzë ndodh vetëm në juntat ushtarake. Shefi i shtabit të përgjithshëm është shefi dhe i kryeministrit, dhe presidentit. Unë kam firmosur procesin e demontimin, ka qenë kërkesë e NATO-s. Nuk e kam ditur ku ka qenë Gërdeci, e kam marrë vesh kur ndodhi”, tha Mediu.
Discussion about this post