Ka zgjatur vetëm 40 minuta seanca e sotme parlamentare, ku nuk kanë munguar incidentet dhe rrëmuja në sallën e Parlamentit.
Shkak për tensionet në seancën e sotme janë bërë trupat e shtuar të efektivëve të Gardës së Republikës, që me urdhër të Lindita Nikollës ishin vendosur si një mur mbrojtës mes vendeve ku ulen ministrat dhe Kryeministri dhe foltores, vendi ku deputetët mbajnë fjalimet. Ajo që ra në sy ishte fakti se në sallë kishte një prezencë të lartë të gardistëve.
Deputetët e opozitës kërkuan sqarime lidhur me situatën e re të krijuar në Kuvend, por kjo nuk e ka shqetësuar aspak kryetaren e Kuvendit, e cila ka tentuar të vijojë me punimet e Parlamentit, si një seancë normale. Madje, në replikat me deputetët e opozitës, nuk kanë munguar ironitë, ccka duket se ka tensionuar edhe më tej situatën.
Deputetë të opozitës kanë qëndruar përgjatë gjithë kohës në këmbë, pranë Foltores, ndërsa Nikolla i jepte fjalën deputetëve të PS-së, që sot ishin përgatitur me një skenar e regji që të flisnin për problemet e qytetarëve, sikundër u shprehën ato.
Momenti më kritik gjatë seancës ishte një përplasje fizike mes deputetit Bledion Nallbatit të PD-së dhe Vullnet Sinës së PS-së, i cili kërkoi i pari fjalën në seancën e sotme. Ndërhyrja e deputetëve të tjerë dhe gardistëve ka shmangur një konfrontim më të madh fizik, që mbeti thjesht në shtyrjen mes dy deputetëve.
Sali Berisha, kreu demokrat, akuzoi Kryeministrin Edi Rama, për të gjitha tensionet në sallën e Kuvendit, pasi ai nuk lejon kërkesat e opozitës për komisione hetimore parlamentare. “Opozita po bën betejë në emër të qytetarëve”, tha Berisha.
Lindita Nikolla është detyruar të ndërpresë dy herë seancën brenda pak minutash, ndërsa u detyrua të mbyllë përfundimisht punimet, pasi morën fjalën në seancë 4 ose 5 deputetë të PS-së, që duket se u përdorën për të tensionuar edhe më tej seancën dhe raportet mes deputetëve.
Ndërkohë nga raportimet mësohet se ka pasur një vendim për përjashtimin nga punimet e Parlamentit të Bledion Nallbatit.
Discussion about this post