Shtatë Kongresmenë të SHBA-së i kanë dërguar një letër Presidentit Joe Biden dhe Sekretarit të Shtetit, Antony Blinken ku shprehin shqetësimin e tyre pas tensioneve të krijuara mes Kosovës dhe Serbisë mbi reciprocitetin e targave.
Ritchie Torres, Jim Himes, Elissa Slotkin, Joe Courtney, Mandaire Jones, Corolyn B. Maloney dhe James P. GcGovern, janë kongresmenët që përmes letrës së tyre kërkojnë që Shtetet e Bashkuara të Amerikës të ndërhyjë për të zgjidhur këtë tension të krijuar mes dy vendeve të Ballkanit.
Në letër shkruhet se pas tensionit për reciprocitetin e targave, Serbia mobilizoi forcat e saj në kufi me Kosovën dhe se këto vijnë nga aleati i saj, Rusia. Për ta përforcuar këtë teori, kongresmenët theksojnë dhe praninë e ambasadorit rus në mobilizimin e ushtrisë.
Anëtarët e Kongresit që janë edhe anëtarë për mbrojtjen e çështjes së shqiptarëve, kërkojnë që Biden të mbështesë përpjekjet për arritjen e një paqeje mes Serbisë dhe Kosovës duke shtuar se Beogradi ka minuar vazhdimisht legjitimitetin dhe sovranitetin e Kosovës.
“Ne shkruajmë për t’ju nxitur që të dyfishoni fokusin amerikan në zgjidhjen e tensioneve Kosovë-Serbi në dritë të përshkallëzimit të fundit të armiqësive midis qeverive të Kosovës dhe Serbisë. Në javët e fundit, një situatë shqetësuese doli si rezultat i një mobilizimi ushtarak në kufi, duke kërcënuar stabilitetin e pasigurt në rajonin e Ballkanit. Duke pasur parasysh forcën joproporcionale të forcave të armatosura të Serbisë, ne ju nxisim që të riangazhoni Shtetet e Bashkuara për të siguruar që aleati ynë Kosova të marrë trajtim të drejtë dhe njohje si vend i pavarur.
Që nga shpallja e pavarësisë së Kosovës nga Serbia në vitin 2008, Serbia ka refuzuar ta njohë Kosovën si një komb të pavarur. Kjo reflektohet në një marrëveshje, në të cilën Serbia lejoi vetëm automjetet që shfaqnin targa me “KS” (Kosovë) dhe refuzoi hyrjen në automjetet me targa “RKS” (Republika e Kosovës). Ne jemi të inkurajuar nga marrëveshja e përkohshme për të parandaloni një shpërthim tjetër, por ne kërkojmë që ju dhe administrata juaj të bëni gjithçka që mundeni për të mbështetur përpjekjet që mund të çojnë në një paqe të qëndrueshme mes Kosovës dhe Serbisë.
Nisur nga disproporcioni i fuqisë ushtarake të Serbisë, u kërkojmë që të ritheksojnë se SHBA do të jetë garante që aleati ynë Kosova, do të marrë trajtim të drejtë dhe njohjen si shtet i pavarur. Ambasadori rus në Beograd, Aleksandër Botsan-Kharchenko vizitoi kufirin (me Kosovën) më 26 shtator, bashkë me ministrin serb të Mbrojtjes, Nebojsa Stefanovic dhe shefin e ushtrisë serbe, Milan Majsilovic.
Shtetet e Bashkuara gjithmonë dhe duhet të vazhdojnë të qëndrojnë me aleatin tonë Kosovën. Ju bëjmë thirrje të dënoni përshkallëzimin e fundit të tensioneve dhe mobilizimin ushtarak serb, si dhe të inkurajoni administratën tuaj të bashkohet me BE -në dhe partnerët tanë të NATO -s në mbështetjen e dialogut mes Kosovës dhe Serbisë për të gjetur një zgjidhje paqësore dhe përfundimtare”, thuhet ndër të tjera në letër.
