Vlora Hyseni, drejtuesja e SHISH, pritet të raportojë të hënën në Komisionin e Sigurisë Kombëtare, pas një kërkese të parashtruar nga deputetë të opozitës.
Hyseni, do të prezantojë gjithashtu raportin vjetor të SHISH, por njëherazi do të pyetet nga ligjvënësit e opozitës, lidhur me situatën në Veri të Kosovës.
Në një kërkesë të deputetit Ferdinand Xhaferri, e mbështetur nga kolegët e tij të opozitës, do i kërkohet shefes së SHISH, mbi qëndrimet që duhen mbajtur nga institucionet lidhur me situatën në veri të Kosovës.
Ndoshta Hyseni mund të pyetet nëse institucionet e sigurisë në Shqipëri kanë pasur ose jo informacione lidhur me precipitimin dhe tensionimin e situatës atje, si dhe për bashkëpunimin mes SHISh dhe institucioneve të sigurisë në Kosovë.
Më herët Hyseni u akuzua se kishte zhvilluar një vizitë në Beograd pa njoftuar instancat e shtetit shqiptar, ndërsa deputeti Flamur Noka kërkoi informacione zyrtare nga Presidenti Bajram Begaj.
Gjithsesi Hyseni mund të japë shpjegime të detajuara në mbledhjen e Komisionit, përfshi edhe aludimet mbi vizitën e saj në Beograd.
Discussion about this post