Rusia ka konfirmuar mbështetjen ndaj Serbisë. Teksa marrëdhëniet janë të tensionuara mes Kosovës dhe Serbisë për shkak të reciprocitetit të vendosur për targat e mjeteve që hyjnë në Kosovë, ambasadori i Rusisë në Serbi, Alexander Botsan-Kharchenko, ka parë nga afër bazën ushtarake të Serbisë në Rashkë, me ministrin e Mbrojtjes së Serbisë, Nebojsha Stefanoviç dhe shefin e Shtatit të Përgjithshëm të Ushtrisë së Serbisë, Milan Mojsiloviç. Veç ambasadorit rus në bazën ushatarake në Rashkë ishte edhe i dërguari i Ministrisë së Mbrojtjes së Rusisë, Alexander Zinchenko.
Ndërkohë që presidenti i Serbisë, Aleksandar Vuçiç, ka urdhëruar ngritjen e gatishmërisë ushtarake për një pjesë të njësive të Ushtrisë së Serbisë.
Situata në veri është tensionuar, ku janë bllokuar rrugët në Jarinjë e Bërnjak, pas vendosjes së masës së reciprocitetit të targave ndaj Serbisë.
Serbia nuk ulet në bisedime nëse Kosova nuk tërheq forcat policore nga Jarinjë e Bërnjaku.
