Ka zgjatur rreth 15 minuta seanca e parë për vitin 2024 në Kuvendin e Shqipërisë, ndërsa kanë vijuar tensionet në sallë, ku deputetët e opozitës kanë protestuar me bilbila, ndërsa mazhoranca ka miratuar mes kaosit dekretet e Presidentit Bajram Begaj për ndryshimet në Qeveri.
Me një prezencë të shtuar në sallën e Kuvendit të efektivëve të Gardës, diplomatët në lozha, dhe Presidentit që priste të mbante një fjalim, deputetët e opozitës kanë qënmdruar rreth foltores së Kuvendit duke i rënë bilbilave, ndërsa Gazment Bardhi me cilësinë e kreut të Grupit Parlamentar të PD-së, i ka kërkuar kryeparlamentares Lindita Nikolla që të largonte nga salla efektivët e Gardës.
Përballë kërkesës së opozitës, Nikolla ka zgjedhur të vijojë seancën dhe të miratojë brenda pak minutash dekretet e Presidentit për ndryshimet në Qeveri.
“Ndjesë presidentit të Republikës që i pamundësohet fjala në Parlament”, tha kryeparlamentarja Lindita Nikolla. Gjithashtu në seancë ka marrë manbdatin e deputetit Plarent Ndreca, i cili zëvendëson Arben Ahmetajn, ish-zv.Kryeministër i shpallur tashmë në kërkim nga SPAK pas hetimeve për aferën e inceneratorëve.
Opozita e cilësoi prezencën e Presidentit të Republikës në Kuvend si një shërbim që ai po i bënte mazhorancës. “Bajram Begaj u soll si ministër i propagandës së Qeverisë, si faktor destabiliteti”, tha Flamur Noka.
Sipas tij, Presidenti nuk mund të pranohet nga opozita si ministër propagande i Qeverisë. Noka tha se Presidenti duhej të kthente ligjet e miratuara nga mazhoranca për Komisionet Hetimore, sikundër duhej të hidhte në kosh Rregulloren e re të miratuar nga Edi Rama.
Discussion about this post