Kryeministri i Kosovës, Albin Kurti ka ftuar në takim liderët e partive opozitare në vend pas tensionimit të situatës në kufirin me Serbinë. Mediet në Kosovë bëjnë me dije se takimi i Kurtit me drejtuesit e partive opozitare do të mbahet ditën e sotme.
Kurti do të presë në takim kreun e PDK-së, Memli Krasniqi, atë të LDK-së Lumir Abdixhiku si dhe kryetarin e AAK-së, Ramush Haradinaj, ndërsa vendi dhe ora nuk dihen ende.
Të hënën e kaluar, qeveria e Kosovës mori vendim për reciprocitet me Serbinë në kuadër të targave. Kësisoj automjetet që futet në Kosovë duhet paraprakisht të bëjnë ndërrimin e targave zyrtare të Serbisë me targat e përkohshme të vendit në pikat kufitare, dhe që kushtojnë pesë euro.
Përpos pikës kufitare në Jarinjë dhe Bërnjak ku serbët kundërshtuan dhe në formë revolte vendosën edhe barrikada për të ndaluar lëvizjen e lirë, në pikat e tjera kufitare shumica e tyre i ndërruan ato pa shkaktuar ndonjë problem.
Prej një jave në këto pika kufitare vazhdojnë të qëndrojnë ekipet e Njësive të Specializuara të Policisë së Kosovës, të cilët po kujdesen për ruajtjen e rendit dhe qetësisë.
Kryeministri Albin Kurti ditë më parë deklaroi se mënyra e vetme për zgjidhjen e këtij problemi është që Serbia ti mbajë targat e veta dhe Kosova të saj, në mënyrë që secili shtet të ketë përfaqësimin e saj, por që padyshim një gjë të tillë e kundërshton fuqishëm shteti serb.
Ditën e djeshme u shënuan incidentet e para, ku qytetarët serbë qe po protestojnë në kufi, dogjën qendrën e regjistrimit të makinave në Zubin Potok. Edhe në Zveçan u hodhën granata dore, duke shkaktuar tym në ajër, fatmirësisht pa shkaktuar persona të lënduar. Përveç kësaj, ushtria serbe ka fluturuar me aeroplanë “MIG” mbi hapësirën ajrore afër kufirit me Kosovën.
