Dita e hënë ka nisur sërish me tensione në 4 komunat në veri të Kosovës. Qytetarët serbë kanë nisur protestën, ndërsa në të katërta komunat ka prezencë të shtuar të policisë së Kosovës dhe të KFOR.
Në komunën e Zveçanit, pak minuta më parë, policia u detyrua të hidhte gaz lotsjellës në derën e godinës për të larguar protestuesit.
Ndërkohë mësohet se Lista Serbe ka shtruar dy kërkesa për largimin e protestuesve nga objekti i komunës, të cilat kanë të bëjnë me largimin e policisë së Kosovës nga zona dhe dorëheqjen e kryetarëve të rinj të zgjedhur në zgjedhjet e 23 prillit.
Përfaqësuesit e Listës Serbe kanë biseduar sot me pjesëtarët e KFOR-it, të cilët janë vendosur pranë objekteve komunale në katër komunat në veri.
Kryetari i Listës Serbe Goran Rakiç iu drejtua anëtarëve të KFOR-it në Zveçan, duke kërkuar që të largohen pjesëtarët e Policisë së Kosovës.
“Kjo është një ndërtesë komunale, një ndërtesë popullore, ku punojnë familjet tona dhe ne do të qëndrojmë këtu. Ata që janë të padëshirueshëm le të largohen. Nëse dëshironi të largoheni, do të bëjmë vend që të kaloni”, ka deklaruar ai.
Zoran Todiç thotë se qytetarët kërkojnë që policia e Kosovës dhe përfaqësuesi shqiptar të largohen nga ndërtesa e komunës në mënyrë që punëtorët të kryejnë punën e tyre.
Kujtojmë që BE dhe SHBA kanë dalë kundër këtij veprimi të qeverisë së Kosovës, ndërsa Vuçiç u shpreh se situata është më e tensionuar se kurrë më parë.
Discussion about this post