Ministria e Punëve të Brendshme u ka bërë thirrje qytetarëve kosovarë që të shmangin pikat e kalimit kufitar në Bërnjak dhe Jarinjë, për shkak të krijimit të pengesave të mundshme.
Përmes një komunikate për media, Ministria ka bërë të ditur se policia e Kosovës po qëndron në të gjitha pikat kufitare me qëllim të zbatimit të marrëveshjes për lëvizjen e lirë, pas vendosjes së reciprocitetit për targat nga Serbia. MPB ka bërë gjithashtu me dije se përgjatë 24 orëve janë lëshuar 1 mijë e 455 targa provuese.
“Ministria e Punëve të Brendshme, Policia e Kosovës bazuar në detyrat dhe autorizimet e saj është duke vazhduar ndërmarrjen e veprimeve policore në nivel vendi, përfshirë të gjitha pikat e kalimit kufitar me qëllim të zbatimit të marrëveshjes për lëvizjen e lirë-konkretisht targave të automjeteve, ku gjatë 24 orëve të fundit ministria ka lëshuar 1.455 targa provuese. Me qëllim të mundësimit të qarkullimit të lëvizjes së lirë, njoftohen qytetarët të cilët planifikojnë të shfrytëzojnë pikat kufitare në Bërnjak dhe Jarinjë, që mundësisht të shfrytëzojnë pikat e tjera kufitare për qarkullim, për shkak të krijimit të pengesave të mundshme”.
Po ashtu, ministria deklaron se situata është e qetë dhe pa incidente, ndërsa forcat policore po punojnë për ruajtjen e stabilitetit.
“Ministria e Punëve të Brendshme, Policia e Kosovës vlerësojnë situatën e qetë dhe pa incidente, ndërsa angazhimi dhe realizimi i detyrave policore do të vazhdojë në interes të ruajtjes së rendit, qetësisë dhe sigurisë publike në vend”, thuhet në njoftim.
Kujtojmë se qeveria e Kosovës të hënën ka marrë vendim për vendosjen e reciprocitetit për targat e Serbisë.
