Ministri i Brendshëm i Kosovës, Xhelal Zveçla ka reaguar lidhur me tensionet në veri të Kosovës, ku në ‘Facebook’ u ka bërë thirrje qytetarëve që mos të bien pre e provokimeve të grupeve kriminale.
Ministri po ashtu ka falënderuar policinë e Kosovës për mënyrën se si e ka menaxhuar situatën dhe shton se institucionet do të jenë në shërbim të qytetarëve të vendit pa dallim dhe të pa kompromis me sulmuesit e demokracisë, ligjit dhe qytetarisë.
Postimi i plotë:
Pas ceremonive të djeshme të betimit të Kryetarëve të komunave veriore, kryetarët e komunave Zveçan, Zubin Potok dhe Leposaviq sot janë vendosur në zyret e tyre në objektet komunale. Ata do të vazhdojnë mandatin e tyre duke qenë në shërbim të të gjithë qytetarëve pa dallim.
Përgëzoj Policinë e Kosovës për profesionalizmin e treguar në ballafaqimin me grupe të organizuara kriminale, që kishin për qëllim pengimin e këtij procesi. 5 pjesëtarë të policisë janë lënduar nga sulmet e këtyre grupeve por që fatmirësisht lëndimet janë të lehta, ata ndihen mirë dhe janë në detyrë.
Ftoj të gjithë qytetarët tanë që të mos bien pre e manipulimeve të grupeve kriminale të cilët për hir të përfitimeve kriminale personale e grupore dëshirojnë kaos dhe suspendim të shtetit të së drejtës e të demokracisë.
Discussion about this post