Pak kohë pas tensioneve në veri të Kosovës, ku situata u agravua deri në përdorimin e armëve, kryeministrja e Serbisë gjatë vizitës në Mitrovicë jep mesazhe paqeje.
Ana Bërnabiç theksoi se dëshiron të përcjellë mesazhe stabiliteti dhe tolerance, pavërisht se kryeministri i Kosovës, Albin Kurti akuzoi qeverinë serbe si organizatore e tensioneve.
Ajo tha se autoritetet nga Serbia, përfshirë presidentin Aleksandar Vuçiç, do të jenë gjithmonë me komunitetin serb në Kosovë dhe shtoi se është e lumtur që ndodhet në Kosovë “në një moment kaq të vështirë”.
“Jam e lumtur që edhe pas provokimeve të fundit, të 31 korrikut, arritëm ta ruajmë paqen. Interes i Republikës së Serbisë dhe popullit serb është paqja dhe stabiliteti”, tha Bërnabiç.
Kryeministrja e Serbisë shtoi se vendi i saj do të vazhdojë të luftojë për popullin serb në Kosovë, në mënyrë që përmirësimi i kushteve të jetesës të shihet në terren.
Ajo theksoi se tani është koha për të formuar Asociacionin e komunave me shumicë serbe në Kosovë dhe tha se një gjë të tillë do ta përsërisë kudo që të shkojë – nga Mitrovica në Bruksel e Pekin.
Discussion about this post