Përmes një postimi në rrjetet sociale, kryetari i Partisë Republikane, Fatmir Mediu ka dënuar sulmet e organizuara nga Serbia në Veri të Kosovës pas tensioneve për marrëveshjen e reciprocitetit. Mediu thekson se bashkërendimi i Serbisë dhe Rusisë për të krijuar tensione në Ballkan është një fakt i provuar. Ai bën thirrje që Shqipëria ta trajtojë me seriozitet maksimal këtë çështje në Këshillin e sigurimit në Kombet e Bashkuara.
“Partia Republikane dënon ashpër sulmet e organizuara nga Serbia dhe Vuçiç, në Veri të Kosovës kundër policisë kosovare. Bashkërendimi i Serbisë dhe Rusisë për të krijuar vatra të reja tensioni në Ballkan është tashmë një fakt i provuar, çdo hap i Vuçiç është në koordinim me Putin. Takimi i Vuçit me Shtabin e ushtrisë Serbe nuk është një teatër por paralajmërim për një agresion të mundshëm ushtarak. Vendosja e ligjshmërisë në gjithë territorin e Kosovës është detyrë e qeverisë Kurti. Zbatimi i reciprocitetit është po ashtu një detyrim për shtetin e Kosovës. Shqipëria duhet ta trajtojë me seriozitet maksimal këtë çështje në Këshillin e Sigurimit në Kombet e Bashkuara dhe NATO, si një kërcënim për rajonin e Ballkanit dhe jo vetëm Kosovën. Komunikimi me drejtues të vendeve të tjera të NSTO-s në rajon që ndajnë të njëjtin shqetësim për sjelljen e Serbisë dhe Rusisë, veçanërisht me Malin e Zi dhe Kroacinë është mëse i nevojshëm për ta prezantuar këtë çështje me seriozitet në plan” – shkruan Mediu.
Discussion about this post