Ministri i brendshëm i Serbisë, Aleksander Vulin, ka reaguar për situatën e krijuar në veri të Kosovës pas vendimit të qeverisë për reciprocitetin e targave.
Vulin i cili njihet për ofendimet drejtuar Kosovës dhe retorikën e tij nacionaliste e ka fyer Kryeministrin e Republikës së Kosovës, Albin Kurtin, duke e quajtur “budalla”.
“Nevojiten të paktën dy persona për ta bërë paqen, ndërkaq për luftën mjafton vetëm një budalla, dhe jam i frikësuar se atë budalla e kemi në anën tjetër, ai ndodhet në Prishtinë dhe emri i tij është Albin Kurti”, shprehet Vulin.
Ai ka thënë se Serbia ka arsye për të qenë e shqetësuar, teksa shtoi se ”njerëzit që udhëheqin në Prishtinë janë qyqarë të vërtetë, dhe mund të presësh çkado prej tyre”.
Sipas tij, tani duhet të negociohet dhe se Prishtina është ajo që duhet ta bëjë hapin e radhës. Me herët, serbët që po protestojnë në veri të Kosovës dogjën qendrën e regjistrimit në Zubin Potok, ndërsa në atë të Zveçanit hodhën granata dore.
