Presidenti Ilir Meta ka reaguar për situatën e tensionuar në veriun e Kosovës pas vendosjes së reciprocitetit të targave me Serbinë nga qeveria kosovare.
Meta shkruan në Facebook se ruajtja e integritetit territorial të Kosovës është faktor kyç për konsolidimin e paqes dhe sigurisë në rajon.
“Ruajtja e sovranitetit shtetëror dhe e integritetit territorial të Republikës së Kosovës është faktor kyç për konsolidimin e paqes, sigurisë, stabilitetit dhe fqinjësisë së mirë në rajon dhe baza e ndërtimit të marrëdhënieve të qëndrueshme me Serbinë”.
Ndër të tjera, Meta bën thirrje për uljen e tensioneve dhe vijimin e dialogut Kosovë-Serbi të ndërmjetësuar nga BE.
“Në këtë frymë palët duhet të kapërcejnë tensionet, të vijojnë dialogun dhe t’u përmbahen detyrimeve, që rrjedhin nga marrëveshjet e arritura nga të dy vendet me ndërmjetësimin e BE dhe SHBA”, shkruan Meta.
Ditën e hënë MPB njoftoi se të gjitha automjetet që mbajnë targa të Serbisë dhe hyjnë në Kosovë, duhet të pajisen me targa të përkohshme, që sipas këtij vendimi mund të bëhet në të gjitha pikat kufitare të Kosovës.
