Kërkesat për shtyrjen e zgjedhjeve të 18 dhjetorit në katër komunat e veriut të Kosovës, po shtohen çdo ditë. Përveç insistimit amerikan për shtyrjen e tyre, për shkak të situatës së brishtë të sigurisë, kërkesës i është bashkuar edhe Gjermania.
Ndërkohë, mediat vendase kanë mësuar se Presidentja e Kosovës, Vjosa Osmani u ka dërguar ftesa liderëve të partive politike parlamentare për t’u takuar sot rreth orës 14:30.
Në këtë takim do të diskutohet situata e sigurisë në veri dhe pengesat që janë paraqitur për të garantuar një proces të sigurt zgjedhor në katër komunat veriore.
Po ashtu, dje ishte parashikuar të mbahej një takim mes saj dhe Komisionit Qendror të Zgjedhjeve, që pritej t’i bënte rekomandime Presidentes Osmani, mirëpo kjo gjë nuk ka ndodhur.
Pas incidenteve në veri, nga SHBA kanë thënë se nuk ka kushte për mbajtjen e zgjedhjeve dhe se ato duhet të shtyhen. Këtij mendimi i është bashkëngjitur edhe ambasadori gjerman në Kosovë, Jorn Rohde, i cili tha se zgjedhjet duhet të shtyhen.
Discussion about this post