Kryetari i Aleancës për Shqiptarët, Arben Taravari ka reaguar për zhvillimet në veri të Kosovës, i cili dënoi dhunën e përdorur nga protestuesit serb ndaj policëve shqiptarë.
“Veprimet e Kosovës për të mbajtur Sovranitetin në Veri janë sa normale aq edhe legjitime! Dhuna e protestuesve serb ndaj policisë së Kosovës dhe ushtarëve të KFOR-it është e Patolerueshme!
Kemi ndjekur me shqetësim situatën e krijuar në Veri të Kosovës. Zyrtarët serb braktisën dhe bojkotuan insitucionet e Kosovës në 4 Komuna të saj.
Krejt normalisht dhe sidomos sipas ligjit, në krye të këtyre institucioneve u vendosën 4 drejtues shqiptarë. Për ironi të fatit serbët i kanë pritur këto zgjedhje me protesta të dhunshme.
E dënojmë ashpër dhunën e përdorur nga protestuesit serb ndaj policëve shqiptarë dhe ushtarëve të KFOR-it, të cilët po kryejnë misionin e tyre në bazë të autorizimeve dhe kompetencave te tyre.
Mbështesim pa asnjë mëdyshje Qeverinë e Kosovës dhe Kryeministrin Albin Kurti. Kjo qeveri është krejt e drejtë në veprimet e saj për të ushtruar sovranitetin e saj në Veri të Kosovës si detyrim kushtetues. Duke mbetur në koordinim me partnerët tanë ndërkombëtar duke përkrahur dhe mbështetur çdo marrëveshje mes Kosovës dhe Serbisë të iniciuar nga BE dhe SHBA, për normalizimin e marrëdhënieve mes dy vendeve.
Inkurajojmë Kosovën dhe Serbinë që të rifillojnë dialogun politik, duke kontribuar për normalizimin e situatës së plotë në Veri të Kosovës e cila fatkeqësisht ka tendenca eskalimi. Është i patjetërsueshëm fillimi i zbatimit të Marrëveshjes së Ohrit, i iniciuar nga Kreu i diplomacisë evropiane, Joseph Borrell dhe me mbështetje të SHBA-ve, me të cilën palët janë dakorduar që ti implementojnë të gjitha pikat e propozimit evropian”, thuhet në deklaratën e Taravarit./Telegrafi
Discussion about this post