Banorë të lagjes nr.7 dhe 8 që preken nga shpronësimet që do të bëhen në kuadër të projektit infrastrukturor “Lidhja e Currilave me rrugën “Aleksandër Goga”, kanë protestuar sot para bashkisë së Durrësit.
Të revoltuar ata kanë kërkuar zgjidhje të problemeve të tyre. “Nuk ka mbledhje, mos guxo. Dilni nga mbledhja. Duhet të ju vijë turp”, shprehet i revoltuar një qytetar.
Gjithashtu ata kanë tentuar edhe të hyjnë në mbledhje duke u përplasur me policinë. “Po dalim nga shtëpitë ,” janë shprehur ata ndërsa tentojnë të hyjnë brenda me forcë.
Në vazhdim të protestës ka patur edhe tension si dhe ndërhyrje nga forcat policore pasi banorët bllokuan edhe rrugën si reagim për cenimin e të drejtave dhe banesave të tyre nga projektet. Ata kanë hedhur gjithashtu vezë dhe letra higjienike në drejtim të godinës.
Ndërkohë, pas ndërhyrjes së policisë janë shoqëruar 3 protestues, ndërsa banorët e tjerë kanë tentuar t’i nxjerrin ata nga furgoni i policisë.
Në mbledhjen e sotme të Këshillit Bashkiak një nga pikat e rendit të ditës lidhej me shpronësimet e shtëpive të këtyre banorëve, të cilat do të shemben për t’i hapur rrugë ndërtimit të unazës.
Banorët deklarojnë në prononcimin e tyre për mediat, se nuk janë vënë në dijeni më përpara lidhur me prishjen e shtëpive dhe kundërshtojnë vlerën e shpronësimit, sepse sipas tyre është e pamundur që me këtë vlerë të blejnë një shtëpi.
Kujtojmë se janë 74 familje që preken nga projekti TID, që pritet të zbatohet në qendrën historike të Durrësit.
Discussion about this post