Këtë të premte është njoftuar se do të mbahet mbledhja për komisionin hetimor për zgjedhjet e 25 prillit. Duket se mosdakordësia mes palëve ka bërë që ky proces të zvarritet.
Kryetari i komisionit, Enkelejd Alibeaj zhvilloi mbledhjen dy ditë më parë, por mazhoranca nuk u paraqit. Duket haptazi se kjo është një tentativë nga ana e tyre për të zvarritur hetimin, duke munguar gjatë mbledhjeve.
“Jemi këtu si detyrim i Kuvendit për një afat 3-mujor të Komisionit. Sot është dita e 6- të, nesër bëhet e 7-a dhe është e qartë se duket që është një strategji e qartë për të penguar veprimtarinë e hetimit të masakrës zgjedhore të 25 prillit. Ata të cilët janë nën akuzë jo vetëm prej nesh, është kjo pjesë e maxhorancës”, shprehej Alibeaj gjatë mbledhjes.
Një ditë më pas, përfaqësuesit e Partisë Socialiste shkuan në sallën ku do të bëhej mbledhja, por ishte bosh. Duke pretenduar kështu se ka një mosrespektim nga ana e komisionit.
Në lidhje me situatën, reagoi ditën e djeshme dhe nënkryetari, ku justifikoi socialistët, duke thënë se ata u paraqitën të enjten, por opozita nuk qe aty. Ai i bëri ftesë Alibeajt për t’u takuar ditën e sotme ose të nesërme, me qëllim miratimin e kalendarit të punës së komisionit.
“Pika 7 e Rregullores ishte mbledhja e radhës. Në kundërshtim me procedurat, kryetari na e mohoi këtë të drejtë. Një nga anëtarët na etiketoi ‘gangsterë’. Propozuam që të mblidheshim sot, pasi ishte vonë dhe nuk mundet të takoheshim. Ne duhej të ishim nëpër zona. Ajo që morëm është se vijmë sot dhe nuk janë të pranishëm. Do të vijmë edhe nesër, pasi ne jemi të vendosur të hetojmë dhe mbrojmë integritetin e zgjedhjeve. Unë vijoj të bëj të njëjtën ftesë, i bëj thirrje zotit Alibeaj të mblidhemi një orë e më parë dhe të vijojmë të caktojmë kalendarin e punës. Nderin e zgjedhjeve ne mund ta mbrojmë vetëm duke hetuar së bashku në këtë komision”, pohoi Gogu.
Nuk dihet se çfarë do të ndodhë me mbledhjen e sotme, por me këtë mosmarrëveshje mes palëve për datën e caktuar, çështja po zvarritet, deri sa të harrohet totalisht.
