Policia ka arrestuar një 33-vjeçar në Kakavijë, pasi dyshohet se ka tentuar që të fusë në mënyrë të parregullt një shtetase 17-vjeçare në territorin shqiptar.
Në cilësinë e provës materiale të riut i është sekuestruar një aparat celular dhe shumë parash.
“Kakavijë, Gjirokastër/Finalizohet operacioni policor i koduar “Front”. Tentoi të ndihmonte një shtetase 17-vjeçare, që të hynte në territorin e Republikës së Shqipërisë, në mënyrë të parregullt, kapet nga shërbimet e Policisë Kufitare dhe vihet në pranga, 33-vjeçari. Seksioni për Hetimin e Trafiqeve të Paligjshme në DVP Gjirokastër, në bashkëpunim me shërbimet e Policisë Kufitare Kakavijë dhe shërbimet e FRONTEX-it, në vijim të punës për goditjen e paligjshmërive në këtë pikë të kalimit kufitar, bazuar dhe në inteligjencën informative, organizuan dhe finalizuan operacionin policor “Front”, si rezultat i të cilit u arrestua në flagrancë shtetasi:
M. G., 33 vjeç, banues në Fier, për veprën penale “Ndihma për kalim të paligjshëm të kufijve”. Ky shtetas është kapur në flagrancë në PPK Kakavijë, duke tentuar të ndihmonte për të hyrë në mënyrë të parregullt, në territorin e Republikës së Shqipërisë, një shtetase 17-vjeçare, të cilin e kishte shoqëruar nga Athina në Kakavijë. në cilësinë e provës materiale u sekuestruan 1 aparat celular dhe një shumë parash. Materialet i kaluan Prokurorisë pranë Gjykatës së Rrethit Gjyqësor Gjirokastër, për veprime të mëtejshme”, njofton policia.
Discussion about this post