Paraditen e sotme një 23-vjeçar ka tentuar të vjedhë në një filial banke në Unazën e Re në Tiranë, por pa rezultat, pasi është arrestuar nga policia në momentin që ka tentuar të thyej xhamin.
Mësohet se i riu i identifikuar si Enrik Ismalaj, ka qenë i vetëm në ngjarje, ndërsa kanë qenë banorët e zonës dhe alarmi i bankës që i kanë prishur më së shumti planet.
Islamaj është arrestuar edhe 3 herë të tjera më parë për vjedhje.
Ai ka mundur të hapë derën e parë të bankës me mjete rrethanore dhe më pas ka tentuar të thyej xhamin me gurë dhe tulla, por nuk ia ka arritur dot.
I riu herën e parë që është marrë në pyetje ka pretenduar se nuk kanë qenë ai, edhe pse policia i ka identifikuar lehtësisht nëpërmjet kamerave të sigurisë, pasi autori nuk ka qenë i maskuar.
Pasi është marrë sërish ne pyetje ai ka dëshmuar se ka qenë kushte depresive dhe nuk ka qenë i vetëdijshëm për veprimet që po kryente.
Njoftimi i policisë:
Tiranë/Vijon puna për goditjen e veprimtarisë kriminale në fushën e vjedhjes së pronës dhe pasurisë.
Falë ndërhyrjes në kohë nga shërbimet e Komisariatit të Policisë Nr. 6, kapet dhe vihet në pranga 23-vjeçari që tentoi të vidhte në një filial banke, në Unazë të Re.
Shërbimet e Komisariatit të Policisë Nr. 6, në vijim të punës për goditjen e veprimtarisë kriminale në fushën e vjedhjes së pronës dhe pasurisë, bazuar dhe më informacionet e marra në rrugë operative se një shtetas, në rrugën “Teodor Keko”, në Unazë të Re, po tentonte të vidhte në një filial banke, kanë organizuar menjëherë punën për kapjen e autorit të dyshuar dhe vënien e tij përpara përgjegjësisë ligjore.
Si rezultat i punës së mirëorganizuar është kapur në flagrancë nga shërbimet e Policisë, në rrugën “Teodor Keko”, shtetasin në tentativë për të vjedhur në një filial banke.
Në përfundim të veprimeve u bë arrestimi në flagrancë i shtetasit 23 vjeç, banues në Tiranë, për veprat penale “Vjedhja e bankave dhe arkave të kursimit”, mbetur në tentativë, dhe “Shkatërrimi i pronës”.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
Discussion about this post