Tentoi të hynte në Shqipëri me 19 mijë euro të padeklaruara, procedohet 44-vjeçari

Një 44-vjeçar nga Kosova do të hetohet në gjendje të lirë pasi tentoi të hynte nëpërmjet pikës kufitare të Morinës me 19 mijë euro të padeklaruara.

Shuma e parave u gjet pas kontrollit fizik të 44-vjeçarit, i cili ishte pasagjer në makinën tip ‘Audi A8’.

Njoftimi i policise

Tentoi të hynte në Shqipëri, me 19 000 euro të padeklaruara, procedohet penalisht 44-vjeçari kosovar.

Sekuestrohet shuma e eurove.

Në kuadër të punës policore që kryhet në bazë të analizës së riskut, me objektiv parandalimin, konstatimin dhe goditjen e paligjshmërive në kufi, shërbimet e Stacionit të Policisë Kufitare Morinë, në hyrje të Shqipërisë, kaluan për kontroll të detajuar, në vijë të dytë, automjetin tip “Audi A8”, në të cilin ishte pasagjer shtetasi V. B., 44 vjeç, banues në Prishtinë.

Nga kontrolli fizik, atij i janë gjetur 19 000 euro që nuk i kishte deklaruar në pkk, konform ligjit në fuqi.

Në përfundim të veprimeve procedurale për rastin, u referuan materialet në Prokurori, ku nisi procedimi në gjendje të lirë për 44-vjeçarin, si dhe u sekuestrua shuma e parave.

Materialet procedurale iu referuan Prokurorisë së Kukësit, për veprime të mëtejshme.