Policia e Lushnjës ka arrestuar në mesnatë një 28 vjeçar, i cili tentoi të vidhte një makinë të parkuar. Sipas njoftimit të policës, vënia në pranga e autorit u bë e mundur falë bashkëpunimit të një qytetari, i cili kishte spikatur autorin dhe telefonoi menjëherë policinë.
Ndër të tjera bëhet me dije se janë sekuestruar në cilësinë e provës materiale automjeti që tentoi të vidhte autori dhe veglat me të cilat ai tentoi të kryente vjedhjen. Ndërsa theksohet si i arrestuari Erixhan Shatrolli akuzohet edhe për një tjetër vjedhje të disa muajve më parë.
“Falë punës së mirorganizuar, shërbimet e Policisë Lushnjë kanë bërë të mundur kapjen në flagrancë të autorit që po tentonte të vidhte automjetin tip “Benz” në pronësi të shtetasit E. Rr. Në vijim të veprimeve, specialistët për Hetimin e Krimeve në Komisariatin e Policisë Lushnjë bënë arrestimin në flagrancë të shtetasit E. Sh., 28 vjeç, banues në Durrës, (i dënuar më parë për vjedhje).
Ky shtetas është autor i dyshuar edhe i vjedhjes së automjetit tip “Ford” në pronësi të shtetasit G. A., ngjarje e ndodhur në datë 08.09.2021 në fshatin Lumth, Lushnjë”, thuhet në njoftim.
Ndërsa njoftohet se, në vijim të veprimeve hetimore, Policia zbardhi dhe një rast të vjedhjes së një tjetër automjeti në Lushnjë, po nga ky shtetas.
