Një tjetër tërmet është regjistruar sot në qytetin e Balikesirit, në Turqinë veriperëndimore, duke shtuar shqetësimin tek banorët e zonës që prej muajsh po përballen me aktivitet të lartë sizmik.
Sipas të dhënave të Agjencisë Turke të Menaxhimit të Fatkeqësive (AFAD), lëkundja e fundit është ndier qartë në qytet dhe zonat përreth, ndërsa fatmirësisht nuk raportohen dëme materiale apo viktima.
Vetëm gjatë tre muajve të fundit, në Balikesir dhe rajonet përreth janë regjistruar rreth 15 mijë tërmete dhe pasgoditje, që variojnë nga magnituda të ulëta deri në lëkundje më të forta që kanë shkaktuar panik tek banorët.
Ekspertët turq thonë se rajoni i Balikesirit ndodhet në një zonë aktive sizmike, pjesë e rripit të njohur të Anadollit Verior, ku pllakat tektonike takohen dhe krijojnë tensione të vazhdueshme. Ata paralajmërojnë se aktiviteti i shtuar sizmik mund të vazhdojë edhe në javët në vijim.
Autoritetet u bëjnë thirrje qytetarëve të mbeten të kujdesshëm dhe të ndjekin udhëzimet e mbrojtjes civile në rast të lëkundjeve të tjera.
Discussion about this post