Mijëra banorë po largohen nga ishulli grek i Santorinit mes një vale aktiviteti të lartë sizmik. Sipas mediave lokale, rreth 6,000 qytetarë kanë larguar nga ishulli me traget që nga e diela.
Në 48 orët e fundit pranë ishullit janë regjistruar më shumë se 300 tërmete, dhe disa ekspertë paralajmërojnë se lëkundjet mund të vazhdojnë për javë të tëra, shkruan BBC.
Autoritetet kanë mbyllur shkollat për të gjithë javën dhe kanë kërkuar shmangien e grumbullimeve të mëdha në ambiente të mbyllura, ndërkohë që kryeministri Kyriakos Mitsotakis ka bërë thirrje për ruajtjen e qetësisë.
Në orët e para të mëngjesit të së martës, qindra njerëz u radhitën në port për të hipur në traget drejt Athinës.
“Gjithçka është e mbyllur. Askush nuk punon tani. I gjithë ishulli është zbrazur,” deklaroi një banor vendas 18-vjeçar për agjencinë Reuters, përpara se të hipte në anije.
Përveç 6,000 banorëve që largohen nga ishulli me traget që nga e Diela, rreth 2,500 deri në 2,700 pasagjerë janë larguar në rrugë ajrore nga Santorini drejt Athinës, sipas Aegean Airlines. Transportuesi ka shtuar tre fluturime emergjente, pas një kërkese nga Ministria e Krizave Klimatike dhe Mbrojtjes Civile.
Sizmologët e konsiderojnë lëkundjet e fundit si të vogla, por masa parandaluese janë marrë në rast të një tërmeti më të madh.
Shërbimet e urgjencës kanë paralajmëruar banorët që të largohen nga zonat e Ammoudi, Armeni dhe Porti i Vjetër i Firës për shkak të rrëshqitjeve të dheut. Departamenti Rajonal i Zjarrfikësve të Egjeut Jugor është vendosur në gatishmëri, ndërsa ekipet e shpëtimit, të pajisura me tendat e mëdha mjekësore të verdha, janë dërguar në ishull. Tërmetet kanë origjinën nga një zonë pranë ishullit të vogël Anydros, në veri-lindje të Santorinit.
Discussion about this post