Tërmeti me magnitudë 6.1 në Turqi shoqërohet me ‘paslëkundje’ të fuqishme, dhjetëra të plagosur

Një tërmet i fuqishëm me magnitudë 6.1 ballë ka goditur mbrëmjen e së hënës Turqinë perëndimore, duke shkaktuar shembjen e disa ndërtesave të dëmtuara nga dridhjet e mëparshme dhe plagosjen e dhjetëra personave.

Sipas Agjencisë turke për Menaxhimin e Fatkeqësive dhe Emergjencave (AFAD), tërmeti kishte epiqendrën në qytetin Sindirgi, në provincën Balikesir, dhe ndodhi në orën 22:48 sipas orës lokale në një thellësi prej rreth 6 kilometrash.

Lëkundjet u ndjenë fuqishëm në disa qytete të mëdha, përfshirë Stambollin, Bursën, Manisën dhe Izmirin, duke shkaktuar panik mes banorëve. Ministri i Brendshëm turk, Ali Yerlikaya, njoftoi se të paktën tre ndërtesa të pabanuara dhe një dyqan dykatësh u shembën në Sindirgi, ndërsa strukturat ishin dëmtuar më parë nga një tërmet i gushtit.

Ndërkohë një tërmet me magnitudë 4.8 të shkallës Rihter ka goditur mëngjesin e sotëm rajonin perëndimor të Turqisë, sipas të dhënave të konfirmuara nga institucionet sizmologjike dhe të rishikuara nga një sizmolog.

Sipas guvernatorit të Balikesirit, Ismail Ustaoglu, 26 persona janë plagosur, shumica prej tyre si pasojë e rënieve nga paniku gjatë tentativës për t’u larguar nga banesat. “Deri më tani, nuk kemi identifikuar ndonjë humbje jete, por vlerësimet në terren po vazhdojnë”, – deklaroi administratori i Sindirgisë, Dogukan Koyuncu, për agjencinë shtetërore Anadolu.

Shumë banorë kanë zgjedhur të qëndrojnë jashtë gjatë natës nga frika e pasgoditjeve, ndërsa autoritetet kanë hapur xhamitë, shkollat dhe palestrat sportive për strehim të përkohshëm. Situata është vështirësuar nga reshjet e shiut që kanë përfshirë rajonin.

Kujtojmë se Sindirgi u godit edhe në gusht të këtij viti nga një tjetër tërmet me të njëjtën magnitudë, 6.1 ballë, ku humbi jetën një person dhe dhjetëra të tjerë u plagosën. Që prej asaj kohe, rajoni i Balikesirit është prekur nga disa lëkundje të vogla sizmike.

Turqia ndodhet mbi një nga vijat më aktive të çarjeve tektonike në botë, çka i bën tërmetet një fenomen të shpeshtë. Vetëm në vitin 2023, një tërmet shkatërrimtar me magnitudë 7.8 ballë në jug të vendit vrau mbi 53 mijë persona dhe dëmtoi rëndë 11 provinca, ndërsa rreth 6 mijë njerëz të tjerë humbën jetën në Sirine veriore.