Kryetari i Shoqatës së Gazetarëve në Adıyaman, Zeki Dişkaya, tha se 11 punonjës të shtypit që punonin në qytet humbën jetën në tërmetet që goditën Turqinë jugore dhe shumë kolegë të tyre u larguan nga qyteti.
Dişkaya shtoi se tërmetet me epiqendër në Kahramanmaraş, të cilësuara si “katastrofa e shekullit”, pothuajse e shkatërruan qytetin.
“Ne varrosëm miqtë tanë, pjesa tjetër e anëtarëve tanë të medias lokale po përpiqen të strehohen tek një i afërm ose të mbrojnë fëmijët dhe familjen e tyre”, tha ai.
Duke thënë se po përpiqen të shërojnë plagët e tërmetit, Dişkaya tha: “Ne tani po vijmë në vete. Shpresoj se do të sigurojmë një lokacion, ta bashkojmë median tonë lokale dhe të bëjmë përpjekje për ta kryer punën tonë”.
“Zëri i shtypit vendas u shua në Adıyaman, shtypi lokal heshti. Fatkeqësisht, Adıyamani heshti gjithashtu kur shtypi lokal u shua. Të gjithë miqtë tanë që humbëm lanë kujtimet e tyre. Ne ende nuk jemi në vete. Zoti mos i dhëntë askujt dhimbje të tilla”, theksoi Dişkaya.
Discussion about this post