Deputetja e Partisë Demokratike, Dhurata Çupi, ka treguar ditën e sotme se shumë banesa janë dëmtuar nga tërmeti që goditi qarkun e Dibrës një ditë më parë. Me anë të një postimi në Facebook, ajo shkruan se shumë qytetarë e kanë kaluar mbrëmjen e djeshme jashtë dhe më e keqja është se bashkitë përgjegjëse nuk janë interesuar për jetën e banorëve dhe as për gjërat që mund te kenë nevojë ata.
Çupi gjithashtu ka listuar dhe numrin e banesave të dëmtuara në disa prej njësive administrative në këtë qark, ndërsa i ka bërë thirrje qeverisë të veprojë. “Në qarkun Dibër , janë prekur nga tërmeti shumë banesa, e rrjedhimisht disa qytetarë mbrëmë kanë qëndruar jashtë. Një mesazh nga një qytetar ne bashkinë Klos i prekur nga lëkundjet e tërmetit duke ju dëmtuar shtëpia, ankohet se administrata e bashkisë Klos , i është përgjigjur se do të vijmë të shikojmë ditën e hënë.
Ndërkohë edhe në njësitë e tjera ke patur dëmtime; 5 banesa në njësinë administrative Fushë-Bulqizë; 3 banesa në njësinë administrative Ostren; 3 banesa në njësinë administrative Gjoric; 1 banesë në njësinë administrative Shupenzë; 1 banesë në njësinë administrative Bulqizë; 1 banesë në njësinë administrative Zerqan”, shkruan ajo.
Tërmeti i një i dite më parë në Dibër u kalua si lëkundje e lehtë pa tërhequr vëmendjen e autoriteteve, por në fakt banorët apelojnë për ndihme për shkak se banesat e disave prej tyre kanë pësuar dëme të mëdha.
