Pas një jave të tmerrshme, Turqia po përpiqet të llogarisë dëmet, pas dy tërmeteve vdekjeprurëse, që goditën pjesën juglindore të vëndit. Vdekjet e konfirmuara në Turqi dhe Siri kanë kaluar 25.000 vetët, ndërsa mijëra njerëz mbeten të zhdukur nën rrënoja.
Edhe në gjendjen më ogurzi, megjithatë, ka ardhur edhe lajmi i gëzueshëm i shpëtimit për mrekulli i një 16-vjeçari, i cili u rekuperua i gjallë nga rrënojat, 119 orë pas goditjes së tërmetit.
Kamilcan Agdas arriti të qëndronte gjallë dhe u dërgua menjëherë në spital për të marrë ndihmën e nevojshme mjekësore, duke përhapur edhe pak shpresë dhe gëzim në komunitetin turk.
Fakti që bëri përshtypje shtesë është se 16-vjeçari kishte veshur fanellën e Fenerbahçes. E sipas gazetës “Sabah” që ka folur me të, shkak ka qenë se Kamilcan ka shkuar në shtrat me fanellën verdheblu, duke pritur me ankth ndeshjen e skuadrës së tij që ishte në ditën e nesërme.
Fenerbahçe nuk qëndroi indiferent ndaj fotos së zbuluar dhe i dërgoi mesazhin e tyre 16-vjeçarit Kamilcan përmes llogarive zyrtare në rrjetet sociale:
“Sonte, në orën e 119-të, besuam edhe një herë në mrekulli! Kemi edhe shumë ndeshje përpara në sezon, ju presim Kamiljan.”
Discussion about this post