Tërmeti në Greqi i para dy ditëve shkaktoi frikë edhe në tre shtete të tjera, përfshi Shqipërinë, Kosovën dhe Maqedoninë e Veriut. Tërmeti i fuqishëm me magnitudë 5.3 ballë të shkallës Rihter me epiqendër Follorinën ishte me thellësi 14.1 km. Ata e kanë kaluar natën në makinë dhe në ambientet e jashtme, duke braktisur kështu nga frika banesat e tyre.
Pwr shkak tw dwmeve, Greqia ka marrë masa duke mbyllur shkollat, si dhe janë thyer xhamat e dyqaneve dhe shtëpive. Për shkak të lëkundjeve të vazhdueshme, objektet kanë rënë brenda shtëpive, ndërsa disa suva janë shkëputur dhe kanë rënë mbi makina.
Bashkitë Follorinë, Amyntaio dhe Prespë të Njësisë Rajonale Follorinë janë shpallur së fundmi gjendje të jashtëzakonshme, pas një vendimi të Sekretarit të Përgjithshëm të Mbrojtjes Civile, Vassilios Papageorgiou. Gjendja e jashtëzakonshme u shpall pas kërkesës nga kryetarët e këtyre tre zonave, për adresimin e emergjencave në menaxhimin e problemeve të lindura nga tërmeti i 9 janarit 2022.
Ndërkohë që në Shqipëri nuk ka asnjë reagim nga ana e instancave shtetërore, sa i përket dëmeve që janë shkaktuar nga tërmeti që lëkundi dhe Shqipërinë. Përveç deklaratës të Ministrit të Mbrojtjes, Niko Peleshi, natën kur ndodhi tërmeti, i cili lajmëronte që deri në ato momente nuk raportohej për dëme, reagim nga ana e Emergjencave Civile në lidhje me bilancin e dëmeve ende nuk ka.
Ndërkohë në media është raportuar se ka 6 banesa të dëmtuara, nga të cilat 2 janë në Bilisht, 2 në fshatin Mançurisht e 2 në fshatin Shuec. Kryetari i Bashkisë Devoll, Eduart Duro, në një prononcim për mediat ka thënë se grupet e emergjencave civile kanë nisur verifikimin në terren për rastet e raportuara. Paraprakisht thuhet se banesat të cilat janë bërë raportime për dëmtime janë banesa të vjetra dhe të amortizuara, të cilat kanë pasur probleme edhe më parë.
Discussion about this post