Tërmeti katastrofik në Marok! Mbi 2000 të vdekur e mijëra të plagosur

Në Marok, një tërmet i fortë me magnitudë 7 ballë goditi rajonin e Marrakech, duke shkaktuar të paktën 2012 të vdekur dhe 2059 të plagosur.

Ky bilanc tragjik është i destinuar të rritet. Sizmografët regjistruan lëkundjen në orën 23:11 të së premtes më 8 shtator. Epiqendra ishte në qendër të vendit, 16 kilometra nga fshati Tata N’Yaaqoub.

Sipas Kryqit të Kuq, umergjenca mund të zgjasë me vite. Janë shpallur tri ditë zie kombëtare në Marok.

Qendra Rajonale e Transfuzionit në Marrakech ka nisur një apel urgjent për dhurimin e gjakut. Bashkimi Europian është treguar solidar: “Gati për të ofruar të gjithë ndihmën e nevojshme”.

Lajmet dhe imazhet e shkatërrimit bënë menjëherë xhiron e botës, madje arritën edhe tek liderët botërorë të mbledhur në Delhi për samitin e G20.

Nga kryeministrja Giorgia Meloni te presidenti amerikan Joe Biden, nga Narendra Modi te kreu i shtetit francez Emmanuel Macron, ka thirrje të shumta solidariteti dhe oferta për të dërguar ndihma.

Tragjedia në Marok ka bashkuar për herë të parë edhe ndjenjat e dy armiqve të hidhur, presidentit ukrainas Volodymyr Zelensky dhe presidentit rus Vladimir Putin, të cilët shprehën ngushëllimet e tyre. Ashtu siç Papa Françesku dërgoi një telegram ngushëllimi për të shprehur “dhimbje dhe solidaritet”.

Algjeria ofroi gjithashtu ndihmë për “popullin vëlla maroken” dhe, në një veprim të konsideruar të jashtëzakonshëm, vendosi të hapë hapësirën e saj ajrore për të lejuar fluturimet humanitare të arrijnë në Marok: Algjeri e kishte mbyllur atë për avionët civilë dhe ushtarakë maroken në vitin 2021 pas ndërprerjes së marrëdhënieve diplomatike me Rabatin.