Dy persona të rrezikshëm janë vënë në prangat e policisë në Tiranë.
Bëhet fjalë për të arrestuarit e identifikuar me iniciale L. Ç., 23 vjeç dhe A. D., 24 vjeç, të dy banues në Shijak, të cilët kanë qëlluar me armë zjarri tip automatik në në vendin e quajtur “Kuç-Vorë”, mbi kodrat e fshatit Gjokaj. Denoncimi për ngjarje në fjalë është bërë nga qytetarët. Ndërsa gjatë kontrollit fizik dhe të automjetit të të arrestuarve shërbimet e Policisë gjetën dhe sekuestruan një armë zjarri automatik, një sasi të vogël lënde narkotike kanabis dhe sende të tjera të kundërligjshme.
Theksojmë se të arrestuarit në fjalë janë edhe autorë të ngjarjes së ndodhur më datë 03.10.2021, ku personi i identifikuar me iniciale B. V. ka kallëzuar se është qëlluar me armë zjarri në ajër dhe për pasojë është dëmtuar automjeti i tij.
Pritet që dy autorët të përballen me akuzën për veprat penale “Armëmbajtja pa leje”, “Prishja e rendit dhe qetësisë publike” dhe “Prodhimi dhe shitja e narkotikëve”.
