Vëmendja kthehet sërish te terrori i udhëheqjes nga talebanët në Afganistan ku është qëlluar për vdekje një pedagoge ekonomie, aktiviste në mbrojtje të të drejtave të grave. Frozan Safi, 29 vjeç, është qëlluar dhe vrarë në veri të Afganistanit , në atë që duket të jetë vdekja e parë e njohur e një aktivisteje të të drejtave të grave, që kur talebanët erdhën në pushtet pothuajse tre muaj më parë.
Gjatë kësaj kohe ekstremistët kanë udhëhequr një lëvizje kryesisht të dhunshme ndaj disidencës, duke rrahur gratë me shkopinj elektrik dhe duke ndaluar e torturuar gazetarët që mbulojnë protestat mbarëkombëtare.
Trupi i viktimës u identifikua në një morg në qytetin Mazar-i-Sharif pasi ajo u zhduk më 20 tetor. “Ne e njohëm atë nga rrobat e saj. Plumbat i kishin shkatërruar fytyrën”, tha motra e Safit, Rita, e cila është mjeke.
“Kishte plagë plumbash gjithandej, shumë për t’u numëruar, në kokën, zemër, gjoks, veshka dhe këmbët e saj. Unaza e saj e fejesës dhe çanta i ishin marrë të dyja“, shtoi Rita.
“Të enjten, forcat e sigurisë talebane sollën trupat e dy grave të paidentifikuara që ishin qëlluar për vdekje në spitalin provincial të Balkh” tha Meraj Faroqi, një mjeke vendase. Ata ishin gjetur së bashku me trupat e dy burrave në një shtëpi në Mazar-i-Sharif, ndërsa policia po heton rastin që me siguri nuk do të gjykohet kurrë.
Vdekjet nënvizojnë ndjenjën e përhapur të frikës në Afganistanin e kontrolluar nga talebanët, ku një valë vrasjesh hakmarrëse të njerëzve të lidhur me qeverinë e mëparshme, ka nxitur një atmosferë mosndëshkimi dhe konfuzioni.
Të enjten, Human Rights Watch tha se rregullat e talebanëve po ndalonin shumicën e grave të operonin si punonjëse ndihmash në vend, duke përshpejtuar një katastrofë humanitare të afërt. Aktivistët thonë se ata janë duke u ndjekur nga talebanët, të cilët kanë përsosur mënyra për të infiltruar dhe frikësuar grupet e grave.
Discussion about this post