Në Gjykatën e Fierit po mbahet sot seanca për shqyrtimin e kërkesës së ish-deputetit të Partisë Demokratike, Ervin Salianji, për lirimin me kusht nga burgu, ku ai ndodhet i izoluar prej tetorit të vitit të kaluar. Shërbimi i Provës pritet të paraqesë raportin e tij lidhur me kërkesën e ish-deputetit demokrat, të cilin avokati i Salianjit e ka përshkruar më herët si “pozitiv”.
Ervin Salianji u dënua me vendim të formës së prerë nga Gjykata e Apelit me 1 vit burg për kallëzim të rremë. Sipas akuzës, Salianji në vitin 2018, nga selia e Partisë Demokratike, publikoi disa audio-përgjime ku denonconte se vëllai i ministrit të Brendshëm të asaj kohe, Fatmir Xhafaj, ishte i përfshirë në trafik droge.
Vetë Salianji si dhe opinioni publik në përgjithësi e kanë cilësuar të gjithë procesin si të montuar politikisht. Argumentat janë se dënimi i tij erdhi si pasojë e denoncimit që ai bëri ndaj vëllait të ministrit të Brendshëm Fatmir Xhafaj, duke e konsideruar këtë një hakmarrje politike. Shumë ekspertë të ligjit dhe opinionbërës kanë shprehur shqetësimin se ky rast ngjall hije të errëta nga sistemi i diktaturës, duke e parë burgosjen e Salianjit si një veprim të orkestruar nga Kryeministri Edi Rama për të goditur një kundërshtar politik të rëndësishëm.
Pamjet e sotme të shoqërimit të Ervin Salianjit në gjykatën e Fierit, me efektivë të shumtë që rrethojnë ish-deputetin tregojnë një siguri të rreptë policore, sikur ai të ishte një individ me rrezikshmëri të lartë kriminale. Ky dekor policor, duket si një mesazh i qartë për këdo që guxon të kundërshtojë Kryeministrin Rama: JU PRET BURGU POLITIK!
Vlen të ceket se burgosja e Salianjit erdhi pak para zgjedhjeve parlamentare dhe u interpretua gjegjësisht edhe si një goditje e drejtpërdrejtë ndaj një figure kyçe të opozitës, i cili ishte zgjedhur drejtues politik i qarkut të Elbasanit.
Përkrahësit e Salianjit janë shprehur se dënimi i tij është një tentativë për të heshtur zërat kritikë dhe për të eliminuar kundërshtarët politikë, duke rikthyer praktika të vjetra të një sistemi autoritar. Ata shpresojnë që gjykata të marrë në konsideratë raportin e Shërbimit të Provës dhe të vendosë për lirimin e tij me kusht, duke e parë këtë si një mundësi për të korrigjuar atë që ata e konsiderojnë një padrejtësi të thellë politike.
Discussion about this post