Forcat RENEA kanë arritur që të arrestojnë 71-vjeçarin që qëlloi me armë zjarri nga ballkoni i banesës në katin e parë të një pallati.
Edmond Naska raportohet se nuk është lënduar dhe po shoqërohet në spital.
Forcat RENEA arritën të hynin brenda banesës duke shkulur kangjellat e ballkonit dhe më pas duke thyer xhamat, pasi i moshuari kishte mbyllur derën.
Pas disa orësh merr fund ankthi dhe paniku tek banorët e zonës, ku i moshuari kishte qëlluar me armë.
71-vjeçari qëlloi me armë zjarri nga ballkoni i banesës në lagjen nr.16 të qytetit të Korçës rreth orës 10:20.
I moshuari, i cili dyshohet se është me probleme mendore, kërcënoi se do të hapte zjarr dhe refuzoi të dorëzohej, duke u izoluar brenda shtëpisë.
Në vendin e ngjarjes shkuan forcat RENEA që bënë të mundur arrestimin e Edmond Naskës.
Uniformat blu raportuan se nga të shtënat nuk ka të lënduar dhe se nuk kishte rrezik për jetën e banorëve.
Njoftimi i policisë:
RENEA neutralizon dhe vë në pranga 71-vjeçarin që qëlloi me armë zjarri, në ajër, nga ballkoni i banesës së tij.
Sekuestrohet arma e zjarrit kallashnikov, me krehër me municion luftarak.
Në vijim të informacionit paraprak të dhënë ditën e sotme, i cili bën fjalë për ngjarjen e ndodhur në lagjen nr. 16, ku shtetasi E. N., 71 vjeç, me probleme të shëndetit mendor, qëlloi me armë zjarri, në ajër, nga ballkoni i banesës së tij, ju bëjmë me dije se:
Me mbërritjen e njësive speciale RENEA, është krijuar perimetri i afërt i sigurisë, si dhe është negociuar me 71-vjeçarin, për t’u dorëzuar. Pas negociatave, 71-vjeçari është dorëzuar dhe më pas është shoqëruar në ambientet e Komisariatit të Policisë Korçë, për veprime të mëtejshme procedurale.
Gjatë kontrollit në banesën e tij është gjetur arma e zjarrit kallashnikov, me krehër me municion luftarak, e cila u sekuestrua në cilësinë e provës materiale.
Grupi hetimor, në drejtimin e Prokurorisë, vijon veprimet për dokumentimin e rrethanave të këtij rasti.
Discussion about this post