Gjashtë burra janë shpallur fajtorë për vrasje dhe tentativë vrasjeje për pjesën e tyre në sulmet terroriste të Brukselit të vitit 2016 që vranë 32 persona dhe plagosën më shumë se 300.
Midis tyre është Salah Abdeslam, i cili tashmë është duke vuajtur një dënim të përjetshëm në Francë për përfshirjen e tij në sulmet terroriste të vitit 2015 në Paris, të cilat kishin në shënjestër teatrin Bataclan dhe Stade de France, ku u vranë 130 persona dhe u plagosën 350. Abdeslam u arrestua katër ditë para sulmit në Bruksel.
Me vendimet e gjykatës mbyllet një kapitull i rëndësishëm në historinë gjyqësore të Belgjikës, pasi në seancat që nisën dhjetorin e kaluar morën pjesë mbi 900 paditës civilë. Bombarduesit, pjesë e një celule belgo-franceze të grupit të Shtetit Islamik, kryen sulme në një stacion metroje të ngarkuar pranë selisë së Bashkimit Evropian në Bruksel dhe aeroportit Zaventem të qytetit, duke vrarë njerëz nga gati një duzinë vendesh.
Vendimet u dhanë në një gjykatë të sigurisë së lartë të ndërtuar me qëllim në ish -selinë evropiane të NATO-s, në periferi të qytetit. Gjashtë nga dhjetë të pandehurit u shpallën fajtorë për 32 akuza, duke përfshirë vrasjen terroriste, tentativën për vrasje terroriste të 695 personave dhe pjesëmarrjen në aktivitetet e një grupi terrorist.
Discussion about this post