Terzic largohet nga stoli i Dortmundit: E dhimbshme të ndahem me ju

Edin Terzic nuk është më trajneri i Borussia Dortmund. 41-vjeçari ka vendosur të japë dorëheqjen nga posti i teknikut të verdhezinjve.

Vendimi, sipas shtypit gjerman, erdhi pas një takimi me drejtuesit e klubit, me kroatin e lindur në Gjermani që njoftoi gjithë tifozët në lidhje me largimin nga skuadra e zemrës.

Terzic qëndroi në pankinën e Dortmundit në tri periudha të ndryshme. Aventura e fundit zgjaste prej korrikut të 2022.

Vjet humbi titullin kampion në javën e fundit, ndërkohë që sezonin që lamë pas mbërriti me djemtë e tij deri në finalen e Champions League.

E humbur 2-0 kundër Realit të Madridit. Ndërkohë që fitoi Kupën e Gjermanisë në vitin 2021.

“Është tepër e dhimbshme për mua të ndaj këtë lajm me ju tifozë, por sot po ndahem me Dortmundin. Ishte një ndër i madh të fitoja Kupën e Gjermanisë dhe ta dërgoja këtë klub fantastik në finalen e Championsit.

Kërkova një takim me drejtuesit pas finales së Wembleyt, sepse pas 10 viteve të kaluara te BVB, nga të cilat 5 në stafin teknik dhe 2.5 si trajner i parë, mendoj se epoka e re e klubit duhet të fillojë me një trajner të ri.

Të gjithë personat afër meje e dinë se largimi ka qenë një vendim shumë i vështirë për t’u marrë, por ndjesia ime nuk ndryshoi as pas diskutimeve intensive.

I uroj më të mirën Dortmundit. Dhe kjo nuk është një lamtumirë, shihemi së shpejti”, janë fjalët e Terzic në videon e ndarjes me verdhezinjtë.